2026 jyly Qazaqmys taý-ken jabdyǵyn jóndeý men qalpyna keltirýge 6,7 mlrd teńge qarastyrdy. Onyń 5,8 mlrd teńgesi jóndeý jumysyna baǵyttaldy. Baǵdarlama jabdyqtardyń tehnikalyq daiyndyǵyn arttyrýǵa, jospardan tys toqtap qalýdyń aldyn alýǵa jáne taý-ken kásiporyndarynyń turaqty jumysyn qamtamasyz etýge baǵyttalǵan, dep habarlaidy dalanews.kz.
Baǵdarlama aiasynda 346 birlik taý-ken tehnikasyna aǵymdaǵy jóndeý jumysy júrgizildi. Jóndeý jumysynyń basym bóligi Jezqazǵan óńirinde oryndalyp, 277 jabdyq jóndeldi. Qaraǵandy óńirinde 31 birlik, Balqash óńirinde 38 birlik tehnika jóndeýden ótti.
Aǵymdaǵy jóndeý jumysymen qatar, negizgi toraptar men agregattardy qalpyna keltirý jáne aýystyrý jumysy da júrgizilýde. Búgingi tańda 193 torap boiynsha jumys oryndaldy. Jyl sońyna deiin taǵy 100-ge jýyq torapty qalpyna keltirý nemese aýystyrý josparlanýda. Jóndeý jumysy burǵylaý qondyrǵylaryn, tieý-jetkizý mashinalaryn, avtosamosvaldardy jáne Caterpillar, Sandvik, Epiroc markaly basqa da taý-ken tehnikasyn qamtidy.
Kásiporyndardy qajetti qosalqy bólshektermen qamtamasyz etýge de erekshe kóńil bólinýde. Qazirgi ýaqytta qoimalarda 183 iri gabaritti shina qory jasaqtalǵan. Bul qor ortasha tutyný kólemin eskergende shamamen 26 kúnge jetedi. Qordy odan ári tolyqtyrý úshin kelisimshart jasalyp, qosymsha 943 shina jetkizýge tapsyrys berildi. Jetkizý jumysy belgilengen kestege sáikes júzege asyrylýda.
2026 jyldyń sońyna deiin qosymsha jóndeý jumysyn júrgizý, tozǵan bólshekterdi qalpyna keltirý jáne óndiristik bólimshelerdi qajetti qosalqy bólshektermen qamtamasyz etý josparlanǵan.
Baǵdarlamany iske asyrý taý-ken jabdyqtarynyń senimdiligin arttyrýǵa, tehnikanyń jospardan tys toqtap qalý qaýpin azaitýǵa jáne kenishterdiń turaqty jumysyn qamtamasyz etýge baǵyttalǵan.
