Qazaqmys jańa aksıonerge kóshý týraly negizdemelik kelisimge qol qoıylǵanyn málimdedi, dep habarlaıdy Dalanews.kz.
«Qazaqmys» korporasıasy jańa aksıonerge «Qazaqmys korporasıasy» JSHS-ǵa baqylaý júrgizý quqyǵyn ótkizýdi kózdeıtin kelisimniń negizdemelik shartyna qol qoıylǵanyn habarlaıdy.
Kelisimge «Qazaqmys» prezıdenti Vladımır Kım men Dırektorlar keńesiniń tóraǵasy Edýard Ogaıdyń ortaq sheshimi boıynsha qol qoıyldy. Qujatqa qol qoıý baqylaýdy tapsyrý prosesiniń bastalǵanyn bildiredi. Taıaýda belgilengen rásim aıasynda kelisim boıynsha barlyq tıisti is-sharalar men mindettemeler júzege asyrylyp, kompanıanyń úlesin satyp alý-satý kelisimsharty jasalady.
Sonymen qatar Qazaqstan Respýblıkasynyń zańnamalyq talaptarynyń saqtalýyna erekshe kóńil bólinedi. Salalyq normaǵa sáıkes, taý-ken-metallýrgıa sektorynda kompanıa úlesiniń ne aksıasynyń ıesin aýystyrý úshin Qazaqstan Respýblıkasy Ónerkásip jáne qurylys mınıstrliginiń, sonymen qatar Básekelestikti qorǵaý jáne damytý agenttiginiń arnaıy ruqsatyn alý talap etiledi.
Sondaı-aq seriktesterin, kredıtorlardy, mınorıtarlyq qatysýshylardy jáne basqa da múddeli taraptardy habardar etý prosesi júrgiziledi. Bul sharalar prosestiń ashyqtyǵyn, der kezinde aqparattandyrýdy jáne barlyq normatıvtik talaptardy, onyń ishinde kompanıanyń qyzmetine qatysatyn tulǵalar aldyndaǵy mindettemelerdi saqtaýdy qamtamasyz etýge baǵyttalǵan.
Qol qoıylǵan qujatqa sáıkes, aksıonerdiń aýysýy óndiristik jáne operasıalyq prosesterge, kelisimsharttyq mindettemelerge, qyzmetkerlerdiń áleýmettik kepildikterine jáne jumys oryndarynyń turaqtylyǵyna áser etpeıdi. «Qazaqmystyń» qyzmeti shtattyq rejımde, al aǵymdaǵy jáne perspektıvalyq jobalardy iske asyrý – qoldanystaǵy strategıalyq josparǵa saı jalǵasady.
