قازاقمىس جاڭا اكسيونەرگە كوشۋ تۋرالى نەگىزدەمەلىك كەلىسىمگە قول قويىلعانىن مالىمدەدى، دەپ حابارلايدى Dalanews.kz.
«قازاقمىس» كورپوراسياسى جاڭا اكسيونەرگە «قازاقمىس كورپوراسياسى» جشس-عا باقىلاۋ جۇرگىزۋ قۇقىعىن وتكىزۋدى كوزدەيتىن كەلىسىمنىڭ نەگىزدەمەلىك شارتىنا قول قويىلعانىن حابارلايدى.
كەلىسىمگە «قازاقمىس» پرەزيدەنتى ۆلاديمير كيم مەن ديرەكتورلار كەڭەسىنىڭ ءتوراعاسى ەدۋارد وگايدىڭ ورتاق شەشىمى بويىنشا قول قويىلدى. قۇجاتقا قول قويۋ باقىلاۋدى تاپسىرۋ پروسەسىنىڭ باستالعانىن بىلدىرەدى. تاياۋدا بەلگىلەنگەن ءراسىم اياسىندا كەلىسىم بويىنشا بارلىق ءتيىستى ءىس-شارالار مەن مىندەتتەمەلەر جۇزەگە اسىرىلىپ، كومپانيانىڭ ۇلەسىن ساتىپ الۋ-ساتۋ كەلىسىمشارتى جاسالادى.
سونىمەن قاتار قازاقستان رەسپۋبليكاسىنىڭ زاڭنامالىق تالاپتارىنىڭ ساقتالۋىنا ەرەكشە كوڭىل بولىنەدى. سالالىق نورماعا سايكەس، تاۋ-كەن-مەتاللۋرگيا سەكتورىندا كومپانيا ۇلەسىنىڭ نە اكسياسىنىڭ يەسىن اۋىستىرۋ ءۇشىن قازاقستان رەسپۋبليكاسى ونەركاسىپ جانە قۇرىلىس مينيسترلىگىنىڭ، سونىمەن قاتار باسەكەلەستىكتى قورعاۋ جانە دامىتۋ اگەنتتىگىنىڭ ارنايى رۇقساتىن الۋ تالاپ ەتىلەدى.
سونداي-اق سەرىكتەستەرىن، كرەديتورلاردى، مينوريتارلىق قاتىسۋشىلاردى جانە باسقا دا مۇددەلى تاراپتاردى حاباردار ەتۋ پروسەسى جۇرگىزىلەدى. بۇل شارالار پروسەستىڭ اشىقتىعىن، دەر كەزىندە اقپاراتتاندىرۋدى جانە بارلىق نورماتيۆتىك تالاپتاردى، ونىڭ ىشىندە كومپانيانىڭ قىزمەتىنە قاتىساتىن تۇلعالار الدىنداعى مىندەتتەمەلەردى ساقتاۋدى قامتاماسىز ەتۋگە باعىتتالعان.
قول قويىلعان قۇجاتقا سايكەس، اكسيونەردىڭ اۋىسۋى وندىرىستىك جانە وپەراسيالىق پروسەستەرگە، كەلىسىمشارتتىق مىندەتتەمەلەرگە، قىزمەتكەرلەردىڭ الەۋمەتتىك كەپىلدىكتەرىنە جانە جۇمىس ورىندارىنىڭ تۇراقتىلىعىنا اسەر ەتپەيدى. «قازاقمىستىڭ» قىزمەتى شتاتتىق رەجيمدە، ال اعىمداعى جانە پەرسپەكتيۆالىق جوبالاردى ىسكە اسىرۋ – قولدانىستاعى ستراتەگيالىق جوسپارعا ساي جالعاسادى.
