«Qazaqmys» korporasıasy ózi jumys isteıtin barlyq óńirde densaýlyq saqtaý júıesin damytýǵa qoldaý kórsetýdi jalǵastyryp jatyr. Bul baǵyttaǵy mańyzdy qadamdardyń biri — «Jezqazǵan medısınalyq ortalyǵy» JSHS bazasyndaǵy kardıohırýrgıalyq kómekti damytý, dep habarlaıdy Dalanews.kz.
2026 jylǵy 5–7 naýryz aralyǵynda medısınalyq ortalyqta júrek-qantamyr júıesiniń aýyr dıagnozdary bar pasıentterge kezekti kardıohırýrgıalyq operasıalar ótkizildi. Operasıalar eldiń jetekshi mamandarynan quralǵan University Medical Center (UMC) komandasymen birlesip, Ulytaý oblysynyń Densaýlyq saqtaý basqarmasy men Áleýmettik medısınalyq saqtandyrý qorynyń qoldaýymen júrgizilýde.
2026 jyly «Qazaqmys» korporasıasy kardıohırýrgıalyq qyzmetti damytýǵa jáne joǵary mamandandyrylǵan operasıalardy júrgizýge qosymsha 447 mln teńge bóldi. Bul qarajat medısınalyq ortalyqtyń múmkindikterin keńeıtip, kúrdeli operasıalardy pasıentterdi respýblıkalyq iri klınıkalarǵa jibermeı-aq jergilikti jerde jasaýǵa múmkindik berdi.
Búgingi tańda medısınalyq ortalyqta 16 aortokoronarlyq shýnttaý (AKSH) operasıasy sátti oryndaldy. Ulytaý oblysynyń densaýlyq saqtaý júıesi úshin bul — júrek-qantamyr aýrýlary bar pasıentterdi emdeýde jańa múmkindikter ashatyn mańyzdy qadam.
Atalǵan operasıalardyń mindetti áleýmettik medısınalyq saqtandyrý (MÁMS) júıesi aıasynda júrgiziletini de mańyzdy. Sonyń arqasynda óńir turǵyndary joǵary tehnologıalyq medısınalyq kómekti tegin ala alady.
Kardıohırýrgıalyq qyzmetti damytý óńirdegi medısınalyq kómektiń deńgeıin aıtarlyqtaı arttyrýǵa múmkindik beredi. Atap aıtqanda, qan aınalymy júıesi aýrýlarynan bolatyn ólim-jitimdi azaıtýǵa, pasıentterdiń basqa óńirlerge shyǵý qajettiligin qysqartýǵa jáne Ulytaý oblysynyń turǵyndary úshin joǵary tehnologıalyq medısınanyń qoljetimdiligin arttyrýǵa yqpal etedi.
Sonymen qatar qýatty kardıohırýrgıalyq qyzmettiń qalyptasýy óńirdegi iri ónerkásiptik kásiporyndar qyzmetkerleriniń medısınalyq qaýipsizdigin qamtamasyz etýde mańyzdy ról atqarady. Bul baǵyttyń damýy Áleýmettik medısınalyq saqtandyrý qory arqyly medısınalyq qyzmetterdi turaqty qarjylandyrýdy qalyptastyryp, Jezqazǵan medısınalyq ortalyǵynyń oblystyq kardıologıalyq ortalyq retindegi mártebesin nyǵaıtýǵa múmkindik beredi.
«Qazaqmys» korporasıasynda densaýlyq saqtaý salasyn qoldaý kompanıanyń áleýmettik jaýapkershiliginiń mańyzdy bóligi. Medısınalyq ınfraqurylymǵa salynǵan ınvestısıalar óńir turǵyndary úshin medısınalyq kómektiń sapasy men qoljetimdiligin arttyryp, jalpy oblystyń densaýlyq saqtaý júıesiniń damýyna yqpal etedi.
