Astanada «Qazaqmys korporasıasy» JSHS Basqarma tóraǵasy Rýslan Óskenáli men «Almaty» ÁKK» AQ Basqarma tóraǵasy Marat Baıdýrın yntymaqtastyq týraly memorandýmǵa qol qoıdy, dep habarlaıdy Dalanews.kz.
Memorandým ózara tıimdi yntymaqtastyqty nyǵaıtýǵa, otandyq óndirýshilerdi qoldaýǵa, jergiliktendirý deńgeıin arttyrýǵa jáne óndiristik kooperasıany keńeıtýge baǵyttalǵan.
Taraptar Almaty qalasy men Ulytaý oblysynyń ekonomıkasyn damytýǵa, otandyq óndirýshilerge qoldaý kórsetýge, sondaı-aq óndiristi jergiliktendirý deńgeıin arttyrýǵa baǵyttalǵan ózara is-qımyl týraly ýaǵdalasty.
Qazaqmys úshin qazaqstandyq qamtýdy damytý uzaq merzimdi strategıanyń negizgi ba bolyp tabylady. Bul tásildiń is júzinde iske asyrylýy naqty kórsetkishpen rastalady: 2025 jyldyń qorytyndysy boıynsha kompanıa otandyq óndirýshilerden shamamen 577 mlrd teńgege ónim men qyzmet satyp aldy. Osy kólemniń shamamen 27%-y, ıaǵnı 152 mlrd teńgesi, Almatynyń kásiporyndaryna tıesili. Bul qalanyń óńiraralyq kooperasıa júıesindegi mańyzdy rólin aıqyndaıdy.
Atalǵan kórsetkish óńiraralyq kooperasıanyń áleýeti joǵary ekenin kórsetip, ónerkásiptik kásiporyndar men bıznes arasyndaǵy seriktestikti odan ári keńeıtýdiń mańyzdylyǵyn rastaıdy.
Memorandým aıasynda «Qazaqmys» Tobynyń kásiporyndary men «Almaty ındýstrıalyq aımaǵy» JSHS («Almaty» ÁKK» AQ enshiles uıymy) rezıdentteri arasyndaǵy kooperasıany damytý, otandyq óndirýshilerden satyp alý úlesin arttyrý, óndiristik qajettilik boıynsha aqparat almasý, sondaı-aq birlesken iskerlik is-sharalar men kelissózder ótkizý kózdelip otyr.
Sonymen qatar, shıkizat resýrsyn qaıta óńdeý salasyn damytýǵa jáne qazaqstandyq kásiporyndar negizinde joǵary qosylǵan quny bar ónimder óndirisiniń tizbegin qurýǵa erekshe nazar aýdaryldy.
Qazirgi kezde «Almaty ındýstrıalyq aımaǵy» aýmaǵynda 147 ınvestısıalyq joba júzege asyrylýda, onyń ishindegi 57 kásiporyn iske qosyldy. Investısıanyń jalpy kólemi 884 mlrd teńgeni quraıdy. 2026 jyly da jalpy somasy 10,3 mlrd teńge bolatyn 8 ınvestısıalyq jobany iske qosý josparlanyp otyr.
Memorandýmǵa qol qoıý óńiraralyq yntymaqtastyqty keńeıtýge, ótkizý naryǵyn ártaraptandyrýǵa jáne Qazaqstannyń ónerkásiptik áleýetin odan ári nyǵaıtýǵa jańa múmkindik ashady.
