Ulytaý oblysy Jańaarqa aýdanyndaǵy "Qazaqmys" korporasıasyna qarasty "Jomart" kenishinde qaza bolǵan kenshilerdiń jeke basyna qatysty tyń derekter belgili boldy, dep habarlaıdy Dalanews.kz.
Ulysmedıa taratqan málimetke sáıkes qaıǵyly oqıǵada kóz jumǵan jeti jumysshy ár óńirden kelip jumys istep júrgen.Olardyń biri Túrkistan oblysynan, ekinshisi Qaraǵandydan kelgen. Qalǵandary Ulytaý, Sátbaev jáne Jezqazǵan óńirleriniń týmalary ekeni anyqtaldy.
Eske salaıyq, buǵan deıin Ulytaý oblysynda shahta opyrylyp, jeti qyzmetker qaza tapqanyn habarlaǵan edik.
Jańaarqa aýdanyndaǵy "Qazaqmys" korporasıasyna qarasty "Jomart" kenishindegi shahtada taý-ken massasy opyryldy. Búgin qutqarýshylar jeti jumysshynyń denesin tapty.
Kabelder úzilýine baılanysty jumysshylarmen baılanys ta úzildi. Avarıalyq-qutqarý jumystaryna Ulytaý jáne Qaraǵandy oblystarynyń TJD kúshteri men quraldary, apattar medısınasy ortalyǵynyń qyzmetkerleri jáne TJM psıhologtary jumyldyryldy.
Premer-mınıstr Oljas Bektenovtiń tapsyrmasy boıynsha Ulytaý oblysy Jańaarqa aýdanyndaǵy shahtadaǵy jaǵdaıdyń sebepterin tergeý jáne zardap shekkenderge kómektesý jónindegi arnaıy komısıa quryldy. Komısıany premer-mınıstrdiń orynbasary Qanat Bozymbaev basqardy.
Bul derekke qatysty Polısıa departamenti málimdeme jasady.
Atalǵan fakti boıynsha QR QK-niń 277-babynyń 3-bóligi «Taý-ken nemese qurylys jumystaryn júrgizý kezinde qaýipsizdik erejelerin buzý» boıynsha is qozǵaldy. Oqıǵa ornynda Ulytaý oblysynyń polısıa departamentiniń jedel-tergeý toptary jumys istep jatyr. Qazirgi ýaqytta barlyq qajetti tergeý amaldary júrgizilip jatyr.
"Jomart" kenishi - Jezqazǵan qalasynan ońtústik-shyǵysqa qaraı 130 shaqyrym jerde ornalasqan. Onda mys sýlfıdi óndiriledi. "Qazaqmys" korporasıasynyń iri aksıoneri - Kazakhmys Copper.
Keıinirek "Qazaqmys" Ulytaý oblysyndaǵy apatty qaza tapqan kenshilerdiń tizimin jarıalady.
Qaza bolǵan kenshilerdiń tizimi:
- Aqshalov Qaırat Amanbekuly, 1975 jyly týǵan, nasos mashınısi;
- Jakýbaev Ardaq Boranbaıuly, 1998 jyly týǵan, jerasty taý-ken sheberi;
- Jumadullaev Baqytbek Nyshanuly, 1975 jyly týǵan, jerasty kenshisi:
- Kenjebekov Orynbek Ámirhanuly, 1991 jyly týǵan, tıeý-jetkizý mashınasynyń mashınısi;
- Moldabekov Ǵalymjan Esenbekuly, 1978 jyly týǵan, burǵylaýshynyń kómekshisi,
- Nuruldaev Oljas Jaǵalbaıuly, 1979 jyly týǵan, jerasty ýchaskesiniń energetık,
- Rojkov Konstantın Vladımırovıch, 1992 jyly týǵan, jerasty taý-ken jabdyqtarynyń elektr slesari.
