«Qazaqmys korporasıasy» JSHS basshylyǵy Q.I. Satbaev atyndagy Jezqazgan tau-ken ondirisi «Jomart» jáne «Jylandy» kenishteriniń ujymymen jumys kezdesýin ótkizdi, dep habarlaıdy Dalanews.kz.
Kezdesýde ónerkásiptik qaýipsizdik, jańǵyrtý jáne ınvestısıalyq baǵdarlamany júzege asyrý máseleleri negizgi taqyryp retinde talqylanyp, eńbekti qorǵaý máselesine erekshe nazar aýdaryldy.
Jumyskerlerge ónerkásiptik qaýipsizdik pen eńbekti qorǵaý talaptaryn saqtaý eńbek ótiline qaramastan barlyq qyzmetkerler úshin mindetti ekeni eskertildi. ÓQjEQ normalaryn saqtaý adam ómiri men densaýlyǵyn qorǵaýdyń negizgi sharty dep kórsetildi.
Kompanıa ózine alǵan áleýmettik mindettemelerdi oryndap, ınvestısıalyq baǵdarlamalardy iske asyryp jatyr. Qarajat geologıalyq barlaýǵa, taý-ken shahtalyq tehnıka parkin jańartýǵa jáne jańa nysandar salýǵa baǵyttalýda. Bul «Jomart» kenishiniń jumysyn turaqtandyrýǵa jáne «Jylandy» kenishiniń óndiristik qýatyn arttyrýǵa múmkindik beredi.
«Jylandy» kenishi aýmaǵyndaǵy «Batys Saryoba» shahtasynda kúrdeli taý-ken jumysyn júrgizý josparlanǵan. Jeldetýdi qamtamasyz etý úshin shahta oqpandaryn jabdyqtaý, konveıerlik jeli salý jáne jerústi ınfraqurylymyn damytý kózdelgen. 2029 jylǵa deıin kenishtiń óndiristik qýatyn jylyna 3 mln tonnadan 5,4 mln tonna ken óndirýge deıin kezeń-kezeńimen arttyrý josparlanýda.
«Jomart» kenishinde úshinshi jeldetý oqpanynyń qurylysy bastaldy. Nysandy paıdalanýǵa berý 2027 jyldyń birinshi toqsanyna josparlanǵan. Sondaı-aq ken ornynyń batys jáne shyǵys qaptaldarynda geologıalyq barlaý jumysyn júrgizý kózdelip otyr.
2026 jyly Jezqazǵan óńirinde ken qoryn naqtylaý jáne ony arttyrý maqsatynda 73 645 qýma metr aýmaqqa geologıalyq barlaý jumysyn júrgiziledi. Kútiletin ósim 5,38 mln tonna kendi quraıdy.
Kezdesý barysynda jumyskerler qosalqy bólshektermen jáne rezervtik tehnıkamen qamtamasyz etý, qosalqy bólshekterdiń sapasy jáne jóndeý jumysyn uıymdastyrý máselelerin kóterdi. «Jomart» jáne «Jylandy» kenishterinde jóndeý brıgadalaryn kúsheıtý basym baǵyt retinde aıqyndaldy. Qosalqy bólshekterdiń sapasy turaqty baqylaýǵa alyndy.
Sonymen qatar jerasty avtobýstaryn tıimdi paıdalaný jáne ózdiginen júretin tehnıkaǵa uqypty qaraý máseleleri talqylandy. «Jomart» kenishiniń jataqhanasyndaǵy oryn tapshylyǵy máselesi jeke qaraldy.
