2026 jyly «Qazaqmys» geologıalyq barlaý júıesin jańartý boıynsha aýqymdy baǵdarlamany iske qosady. Bul geologıalyq-marksheıderlik jumysty sıfrlandyrýmen qatar Jezqazǵan qalasynda zamanaýı ınfraqurylym qurýdy qamtıdy, dep habarlaıdy Dalanews.kz.
Mundaı sheshim kompanıanyń bes kenishinde Micromine baǵdarlamalyq jasaqtamasyn qoldanyp júrgizilgen ishki taldaý men táýelsiz aýdıt qorytyndysy boıynsha qabyldandy. Tekserý nátıjesinde qoldanystaǵy quraldardyń tolyq kólemde paıdalanylmaıtyny, al esepteý kóp jaǵdaıda 2D formatynda júrgizilgeni anyqtaldy. Bul modeldeý men boljaý múmkindigin shekteıdi.
2026 jyly kompanıa tolyqqandy úsh ólshemdi geologıalyq modeldeýge kóshedi. Sıfrlandyrý baǵdarlamasy aıasynda shamamen 400 mamandy Micromine Origin & Beyond júıesimen jumys isteýge oqytý josparlanǵan. Al beıindi mamandar úshin Micromine Advance júıesi boıynsha tereńdetilgen kýrstar uıymdastyrylady. Sonymen qatar ken oryndarynyń lıtologıalyq jáne gıdrologıalyq modelderi jasalýda. Bul tek ken qabattarynyń geometrıasyn ǵana emes, sondaı-aq kúrdeli tabıǵı faktorlardy da eskerýge múmkindik beredi.
Sondaı-aq Geobank – geologıalyq derekterdi saqtaýǵa jáne taldaýǵa arnalǵan ortalyqtandyrylǵan júıe engizilýde. Bul barlyq aktıvter boıynsha biryńǵaı aqparattyq baza qalyptastyryp, josparlaý sapasyn arttyrýǵa múmkindik beredi. Osylaısha kompanıa ken qoryn esepteý dáldigin arttyryp, óndirýdi josparlaý kezinde táýekelderdi azaıtýdy jáne geologıalyq modeldeý úderisin zamanaýı halyqaralyq standartqa sáıkestendirýdi kózdeıdi.
Sıfrlyq ózgerister jańa ınfraqurylym qurýmen tolyqtyrylady. Jezqazǵanda jalpy aýdany shamamen 14 myń sharshy metr bolatyn geologıalyq klaster qurylýda. Ol qýaty 200 myń qýma metrge deıingi zamanaýı kern saqtaý qoımasyn, geomıneralogıalyq jáne geofızıkalyq zerthanalardy, dárishanalardy jáne murajaı aımaǵyn qamtıdy.
Kern saqtaý qoımasyn basqarý ALS halyqaralyq kompanıasymen (Avstralıa) yntymaqtastyqta júzege asyrylady, al jobanyń bilim berý komponenti Colorado School of Mines ýnıversıtetimen (AQSH) seriktestik aıasynda iske asyrylady. Qazirdiń ózinde nysandardyń bir bóliginiń qurylysy aıaqtaldy, al keıbir elementterdi aıaqtaý 2026 jyldyń III-IV toqsandaryna josparlanǵan. Klaster aıasynda shamamen 200 jańa jumys ornyn ashý kózdelýde.
Osylaısha geologıalyq barlaýdyń tolyq sıkly qalyptasady – kerndi saqtaý men zertteýden bastap sıfrlyq modeldeýge jáne maman daıarlaýǵa deıingi úderistiń barlyǵy qamtylady. Zamanaýı ınfraqurylym geologıalyq materıaldardy júıeleýge múmkindik beredi, al úsh ólshemdi modeldeýdi engizý óndiristi naqty josparlaýǵa jáne mıneraldyq-shıkizat qorynyń turaqty damýyna jol ashady.
Ondaǵan jyldar boıy ıgerilip kele jatqan negizgi ken oryndary bar kompanıa úshin geologıalyq qyzmetti jańartý strategıalyq baǵytqa aınalady. Úsh ólshemdi modeldeýge kóshý jáne geoklaster qurý óndiristi josparlaý tásilin birneshe jylǵa alǵa jyljytady. Geologıalyq barlaý anaǵurlym dálirek, boljamdy jáne tehnologıalyq sıpatqa ıe bolady.
