2026 جىلى «قازاقمىس» گەولوگيالىق بارلاۋ جۇيەسىن جاڭارتۋ بويىنشا اۋقىمدى باعدارلامانى ىسكە قوسادى. بۇل گەولوگيالىق-ماركشەيدەرلىك جۇمىستى سيفرلاندىرۋمەن قاتار جەزقازعان قالاسىندا زاماناۋي ينفراقۇرىلىم قۇرۋدى قامتيدى، دەپ حابارلايدى Dalanews.kz.
مۇنداي شەشىم كومپانيانىڭ بەس كەنىشىندە Micromine باعدارلامالىق جاساقتاماسىن قولدانىپ جۇرگىزىلگەن ىشكى تالداۋ مەن تاۋەلسىز اۋديت قورىتىندىسى بويىنشا قابىلداندى. تەكسەرۋ ناتيجەسىندە قولدانىستاعى قۇرالداردىڭ تولىق كولەمدە پايدالانىلمايتىنى، ال ەسەپتەۋ كوپ جاعدايدا 2D فورماتىندا جۇرگىزىلگەنى انىقتالدى. بۇل مودەلدەۋ مەن بولجاۋ مۇمكىندىگىن شەكتەيدى.
2026 جىلى كومپانيا تولىققاندى ءۇش ولشەمدى گەولوگيالىق مودەلدەۋگە كوشەدى. سيفرلاندىرۋ باعدارلاماسى اياسىندا شامامەن 400 ماماندى Micromine Origin & Beyond جۇيەسىمەن جۇمىس ىستەۋگە وقىتۋ جوسپارلانعان. ال بەيىندى ماماندار ءۇشىن Micromine Advance جۇيەسى بويىنشا تەرەڭدەتىلگەن كۋرستار ۇيىمداستىرىلادى. سونىمەن قاتار كەن ورىندارىنىڭ ليتولوگيالىق جانە گيدرولوگيالىق مودەلدەرى جاسالۋدا. بۇل تەك كەن قاباتتارىنىڭ گەومەترياسىن عانا ەمەس، سونداي-اق كۇردەلى تابيعي فاكتورلاردى دا ەسكەرۋگە مۇمكىندىك بەرەدى.
سونداي-اق Geobank – گەولوگيالىق دەرەكتەردى ساقتاۋعا جانە تالداۋعا ارنالعان ورتالىقتاندىرىلعان جۇيە ەنگىزىلۋدە. بۇل بارلىق اكتيۆتەر بويىنشا ءبىرىڭعاي اقپاراتتىق بازا قالىپتاستىرىپ، جوسپارلاۋ ساپاسىن ارتتىرۋعا مۇمكىندىك بەرەدى. وسىلايشا كومپانيا كەن قورىن ەسەپتەۋ دالدىگىن ارتتىرىپ، ءوندىرۋدى جوسپارلاۋ كەزىندە تاۋەكەلدەردى ازايتۋدى جانە گەولوگيالىق مودەلدەۋ ۇدەرىسىن زاماناۋي حالىقارالىق ستاندارتقا سايكەستەندىرۋدى كوزدەيدى.
سيفرلىق وزگەرىستەر جاڭا ينفراقۇرىلىم قۇرۋمەن تولىقتىرىلادى. جەزقازعاندا جالپى اۋدانى شامامەن 14 مىڭ شارشى مەتر بولاتىن گەولوگيالىق كلاستەر قۇرىلۋدا. ول قۋاتى 200 مىڭ قۋما مەترگە دەيىنگى زاماناۋي كەرن ساقتاۋ قويماسىن، گەومينەرالوگيالىق جانە گەوفيزيكالىق زەرتحانالاردى، ءدارىسحانالاردى جانە مۇراجاي ايماعىن قامتيدى.
كەرن ساقتاۋ قويماسىن باسقارۋ ALS حالىقارالىق كومپانياسىمەن (اۆستراليا) ىنتىماقتاستىقتا جۇزەگە اسىرىلادى، ال جوبانىڭ ءبىلىم بەرۋ كومپونەنتى Colorado School of Mines ۋنيۆەرسيتەتىمەن (اقش) سەرىكتەستىك اياسىندا ىسكە اسىرىلادى. ءقازىردىڭ وزىندە نىسانداردىڭ ءبىر بولىگىنىڭ قۇرىلىسى اياقتالدى، ال كەيبىر ەلەمەنتتەردى اياقتاۋ 2026 جىلدىڭ III-IV توقساندارىنا جوسپارلانعان. كلاستەر اياسىندا شامامەن 200 جاڭا جۇمىس ورنىن اشۋ كوزدەلۋدە.
وسىلايشا گەولوگيالىق بارلاۋدىڭ تولىق سيكلى قالىپتاسادى – كەرندى ساقتاۋ مەن زەرتتەۋدەن باستاپ سيفرلىق مودەلدەۋگە جانە مامان دايارلاۋعا دەيىنگى ۇدەرىستىڭ بارلىعى قامتىلادى. زاماناۋي ينفراقۇرىلىم گەولوگيالىق ماتەريالداردى جۇيەلەۋگە مۇمكىندىك بەرەدى، ال ءۇش ولشەمدى مودەلدەۋدى ەنگىزۋ ءوندىرىستى ناقتى جوسپارلاۋعا جانە مينەرالدىق-شيكىزات قورىنىڭ تۇراقتى دامۋىنا جول اشادى.
ونداعان جىلدار بويى يگەرىلىپ كەلە جاتقان نەگىزگى كەن ورىندارى بار كومپانيا ءۇشىن گەولوگيالىق قىزمەتتى جاڭارتۋ ستراتەگيالىق باعىتقا اينالادى. ءۇش ولشەمدى مودەلدەۋگە كوشۋ جانە گەوكلاستەر قۇرۋ ءوندىرىستى جوسپارلاۋ ءتاسىلىن بىرنەشە جىلعا العا جىلجىتادى. گەولوگيالىق بارلاۋ اناعۇرلىم دالىرەك، بولجامدى جانە تەحنولوگيالىق سيپاتقا يە بولادى.
