"Qazaqmys korporatsiiasy" JShS tóraǵasy Jezqazǵan qalasynda bolǵan oqiǵaǵa bailanysty úndeý jariialady, dep habarlaidy Dalanews.kz.
Ol 24 qańtarda jariialandy.
Búgin biz "Kásip Qorǵan" kásipodaq uiymynyń tóraǵasy Toǵyzbai Tájbenovpen qoshtastyq. Toǵyzbai Absamatulynyń qaitys bolǵany týraly qaiǵyly habardy qatty qaiǵyra otyryp, qabyl aldyq.
"Qazaqmys korporatsiiasy" JShS birinshi basshysy retinde kompaniia bul qaiǵyly jaǵdaidyń sebepterin anyqtaýǵa bar kúsh-jigerin salady dep tolyqtai aita alamyn. Qazirgi ýaqytta quqyq qorǵaý organdary qajetti sharalardy qabyldaýda, sodan keiin oqiǵanyń barlyq mán-jailary anyqtalady.
Osy qaiǵyly oqiǵanyń tóńireginde qazirgi ýaqytta túrli pikirler aitylyp jatyr. Men bul laýazymǵa Toǵyzbai Tájbenovti adal, parasatty jáne joǵary kásibi qasietteri úshin usynǵanymdy atap ótkim keledi.
Sol sebepti de merziminen buryn qorytyndy jasaýdan bas tartyp, tergeý nátijelerin kútý kerek dep sanaimyn.
Men orny tolmas qaiǵyǵa bailanysty Toǵyzbai Absamatulynyń týystary men jaqyndaryna shyn júrekten qaiǵy men qaiǵy-qasiretterine ortaqtasyp, kóńil aitamyn.
21 qańtarda "Kásipqorǵan" kásipodaǵynyń tóraǵasy Toǵyzbai Tájbenov qyzmettik keńsede ózara sózge kelgen "Qazaqmys korporatsiiasy" JShS bas direktory Amangeldi Miniǵulovty tóbeles kezinde pyshaqpen jaraqattady.
Sondai-aq, ekeýine ara túspek bolǵan korporatsiianyń qyzmetkeri Sabyrjan Tembaev ta keýde tusynan pyshaq jaraqatyn aldy. Osy jaittardan soń kásipodaq qyzmetkeri óz-ózine qol jumsady delindi. Biraq ony óltirý faktisi de tekserilip jatyr.
Dárigerler jaraqattanǵan ekeýge ota jasalǵanyn habarlaǵan.
Bul oqiǵaǵa ne sebep bolýy múmkin ekendigine qatysty Salalyq jumysshylar kásipodaǵynyń tóraǵasy Murat Mashkenov óz boljamymen bólisken.
Mashkenov pyshaqqa túsken Miniǵulovty tanymaitynyn basa atap ótken. Biraq óz-ózine qol jumsaǵan Tájbenovpen birge ol jumys barysymen jaqsy tanys eken.
- Ol sabyrly adam bolatyn, degenmen ádiletsizdikke kelgende eshnársege tózbeitin, birden kóterilip shyǵatyn, menińshe, bizdegi ár ekinshi adam "osyndai" shyǵar, - dedi Mashkenov.
Shyn máninde, salalyq kásipodaq quramyna kiretin ujymdarda ishki janjal, narazylyqqa keletin bolsaq, ol bólek áńgime.
- Ondai bizde únemi bolyp turady: uiym úlken, respýblikalyq mártebege ie, shamamen 60 myń adam jumys isteidi. Ár ujymda jalaqyǵa, eńbek jaǵdailary boiynsha túrli shaǵym men talaptar bolady ǵoi. Ol osy máselelerdiń bárimen betpe-bet kelip júrgen adam. Shamasy, osyndai kezde qandai da bir shielenis ýshyqqan bolýy múmkin.
Tájbenov ujymdyq organdardyń kelisiminsiz óz betinshe kóbine sheshim qabyldai bastady sońǵy kezderi.
Eger ujymdyq organdar deńgeiinde osy máseleler qaralsa, jumys berýshimen ústel basynda máseleni sheshýge bolar edi, onda bul janjal bolmas pa edi. (...) Qandai da bir qaqtyǵys boldy ǵoi, bir-birin jaqtyrmai qaldy ma nemese basqa nárse boldy ma eken. Ústel basyna otyryp, kelissóz júrgizýdiń ornyna, mine osyndai yńǵaisyz jaǵdai oryn aldy, sońy tóbeleske, qol jumsaýǵa ulasqan, - dedi ol.
