«Qazaqmysta» 2026-2028 jyldarǵa arnalǵan mıneraldyq-shıkizat bazasyn damytý jáne óndiristik qyzmet jospary bekitildi. Kompanıa qordy tolyqtyrý jáne jumys istep turǵan kásiporyndarda turaqty óndiristi qamtamasyz etý baǵytynda jumys júrgizýde, dep habarlaıdy Dalanews.kz.

Búgingi tańda kenniń jıyntyq qory 551,8 mln tonnany quraıdy. Bul qor óndiristi shamamen 16 jyl qamtamasyz etýge jetedi dep baǵalanýda. Osyǵan baılanysty resýrstyq bazany keńeıtý jáne ken oryndarynyń paıdalaný merzimin uzartý basym baǵytqa aınalýda.

2026-2028 jyldar aralyǵynda ken qory 365 mln tonnaǵa artady dep kútilýde. Sondaı-aq mystyń balanstyq qory 2 328 tonnaǵa ulǵaıady dep boljanýda.

Barlaý jáne baǵalaý jumysy Jezqazǵan, Qaraǵandy jáne Balqash óńirlerinde, sondaı-aq qoldanystaǵy nysandardan 100-200 shaqyrym radıýstaǵy jańa ýchaskelerde júrgizilýde. Mundaı ádis ıgerilgen aýmaqtarǵa jaqyn jerde ınfraqurylymdy damytýǵa jáne ınvestısıalyq táýekeldi tómendetýge múmkindik beredi.

Qordy ulǵaıtý jumysy óndiristik baǵdarlamamen tikeleı baılanysty. 2026 jyly 31,7 mln tonna ken óndirý, 33,1 mln tonna ken óńdeý jáne 254,6 myń tonna mys konsentratyn shyǵarý josparlanǵan.

Sonymen qatar damý jáne jańǵyrtý jobalary iske asyrylýda. Jezqazǵan óńirinde «Jylandy» jáne «Jomart» kenishterin keńeıtý jumysy jalǵasýda. Jezqazǵan ken ornynda (SHJK, OJK, BJK) ınjenerlik komýnıkasıalardy kóshirý jáne geologıalyq barlaý jumysyn eskere otyryp, óndiris kólemi turaqtandyrylýda.

«Qusmuryn» kenishinde jumysty qaıta bastaý qarastyrylýda, bul Karaǵaıly fabrıkasyn aldaǵy 10 jylda shıkizatpen qamtamasyz etýge múmkindik beredi. «Nurqazǵan» kenishin damytý jumysy júrgizilýde, Shatyrkól-Jaısań klasteriniń tómengi qabattarynda qorlardy ashý jumystary jalǵasýda.

Balqash óńirindegi «Qońyrat» kenishinde jumysty jańǵyrtý josparlandy. 2022-2025 jyldary júrgizilgen geologıalyq barlaý jumysynyń qorytyndysynda Saıaq ken ornynda 10 mln tonna ken qory rastaldy. Bul onyń paıdalaný merzimin 2031-2042 jyldarǵa deıin uzartýǵa múmkindik beredi.

Joba tek óndirý kólemin qamtamasyz etý úshin ǵana emes, sonymen qatar taý-ken jumysyn turaqtandyrýǵa baǵyttalǵan. Geomehanıkalyq turaqtylyq pen jabdyqty jańǵyrtý erekshe nazarǵa alynýda, bul birqatar ken oryndarynyń paıdalaný merzimin 2032-2052 jyldarǵa deıin uzartýǵa múmkindik beredi.

Osylaısha, kompanıa damýdyń keshendi modelin quryp, qoryn tolyqtyrady, qoldanystaǵy qýatyn jańartady jáne jańa nysandardy iske qosady. Qordy arttyrý jáne kenishterdi jańǵyrtý jumysy bolashaqta ken óndirý jáne óńdeý kólemin turaqty ustap turýǵa múmkindik beredi. Óndiristik baǵdarlama kásiporyndardyń ondaǵan jyldardaǵy turaqty jumysyn esepke ala otyryp qurylady.