Kásipker Qasym Qasabekov Almaty oblysynyń taý bókterinde ornalasqan Aqtas taý-shańǵy kýrortynda birqatar máselege kýá bolǵanyn aityp, memlekettik tildiń qoldanylmaýy men qyzmetkerler quramyna qatysty pikir bildirdi, dep habarlaidy Dalanews.kz.
Kásipkerdiń aitýynsha, kýrorttaǵy aspaly jol ýaqytsha toqtaǵan sátte dabyl habarlamalary tek orys jáne aǵylshyn tilderinde berilgen, al qazaq tilinde eskertý jasalmaǵan.
“Biz Qazaqstanda turamyz. Sonda nege eskertý tek oryssha jáne aǵylshynsha aitylady? Qazaq tilinde nege joq?”, – deidi ol.
Kásipker sondai-aq kýrorttaǵy qyzmetkerler quramyna da nazar aýdardy. Sózinshe, demalys ornynda jumys isteitin qyzmetkerlerdiń basym bóligi ózge ult ókilderi, al qazaq ultynyń ókilderi sirek kezdesedi.
“Men ultqa bólinýdi maqsat etpeimin. Qazaqstan – kópultty el. Biraq sonda qazaqtar bul salada jumys istei almai ma? Qazaqtar shańǵy tebýdi bilmei me, instrýktor, injener nemese kúzetshi bola almai ma?”, – dep tańdanysyn bildirdi Qasabekov.
Ol bul suraqty kýrorttaǵy qyzmetkerlerdiń ózderine de qoiǵanyn aitady. Alaida olar da ne sebepti qazaq ulty ókilderiniń az ekenin naqty túsindire almaǵan. Kásipker týristik nysandarda qazaq tiliniń qoldanysy men otandyq mamandardyń tartylýy mańyzdy ekenin atap ótti.
