Almatyda "Elge kómek" qaiyrymdylyq qorynyń jetekshisi, ózin áleýmettik jelilerde "Qazaq Robin Gýdy" dep ataǵan bloger Iliias Sáriev pen onyń sybailasy Aqtoty Dúiseeva asa iri kólemdegi alaiaqtyq jasady degen aiyppen sotqa tartyldy, dep habarlaidy Dalanews.kz "Qazaqparatqa" silteme jasap.
Blogerdiń ustalǵany sáýir aiynda belgili boldy. Qylmystyq iste 26 epizod bar. Aiyptaý aktisine sáikes, turaqty jumysy joq Sáriev alaiaqtyq jasaýǵa oilastyryp, áleýmettik jelidegi paraqshasy arqyly muqtaj jandarǵa kómek úshin aqsha jinai alatyny týraly jalǵan aqparat taratqan.
Bir epizodta jábirlenýshi shetelde týysyn emdetý úshin 35 mln teńge izdep júrgende, blogerden qarjy jinaýdy uiymdastyrýdy suraǵan. Ol bul qyzmeti úshin 1,5 mln teńge talap etip, onyń úshten bir bóligin alǵan.
Sondai-aq is materialdarynda Dúiseeva ekeýi áleýmettik jeli arqyly musylmandarǵa Mekkege qajylyq saparyn adam basyna 500-600 myń teńgege elitalyq nómirlerde ornalastyrýmen birge usynǵany kórsetilgen. Bir jábirlenýshi bul usynysqa senip, 1 mln teńgeden astam qarjysynan aiyrylǵan.
Buǵan deiin Astanada úsh «qaiyrymdylyq qory» jasóspirimderdi paidalanyp, 340 mln teńge jinap alǵany habarlanǵan edi.
