الماتىدا "ەلگە كومەك" قايىرىمدىلىق قورىنىڭ جەتەكشىسى، ءوزىن الەۋمەتتىك جەلىلەردە "قازاق روبين گۋدى" دەپ اتاعان بلوگەر ءىلياس سارييەۆ پەن ونىڭ سىبايلاسى اقتوتى دۇيسەيەۆا اسا ءىرى كولەمدەگى الاياقتىق جاسادى دەگەن ايىپپەن سوتقا تارتىلدى، دەپ حابارلايدى Dalanews.kz "قازاقپاراتقا" سىلتەمە جاساپ.
بلوگەردىڭ ۇستالعانى ءساۋىر ايىندا بەلگىلى بولدى. قىلمىستىق ىستە 26 ەپيزود بار. ايىپتاۋ اكتىسىنە سايكەس، تۇراقتى جۇمىسى جوق سارييەۆ الاياقتىق جاساۋعا ويلاستىرىپ، الەۋمەتتىك جەلىدەگى پاراقشاسى ارقىلى مۇقتاج جاندارعا كومەك ءۇشىن اقشا جيناي الاتىنى تۋرالى جالعان اقپارات تاراتقان.
ءبىر ەپيزودتا جابىرلەنۋشى شەتەلدە تۋىسىن ەمدەتۋ ءۇشىن 35 ملن تەڭگە ىزدەپ جۇرگەندە، بلوگەردەن قارجى جيناۋدى ۇيىمداستىرۋدى سۇراعان. ول بۇل قىزمەتى ءۇشىن 1،5 ملن تەڭگە تالاپ ەتىپ، ونىڭ ۇشتەن ءبىر بولىگىن العان.
سونداي-اق ءىس ماتەريالدارىندا دۇيسەيەۆا ەكەۋى الەۋمەتتىك جەلى ارقىلى مۇسىلماندارعا مەككەگە قاجىلىق ساپارىن ادام باسىنا 500-600 مىڭ تەڭگەگە ەليتالىق نومىرلەردە ورنالاستىرۋمەن بىرگە ۇسىنعانى كورسەتىلگەن. ءبىر جابىرلەنۋشى بۇل ۇسىنىسقا سەنىپ، 1 ملن تەڭگەدەن استام قارجىسىنان ايىرىلعان.
بۇعان دەيىن استانادا ءۇش «قايىرىمدىلىق قورى» جاسوسپىرىمدەردى پايدالانىپ، 340 ملن تەڭگە جيناپ العانى حابارلانعان ەدى.
