«Kompúterlik grafıkasy, mýzykasy rettelip, 16 jeltoqsanda fılmniń sońǵy nusqasy usynylady. Qatty synamańyzdar, áli jetispeı jatqan tustary bar. Fılmge barlyǵy 280 mln teńge jumsaldy. «Bazıs A» kompanıasy men «Frıdom fınans» kompanıasyna úlken alǵysymyzdy aıtamyz. 50 mln teńgedeı qarjy jetispeýshiligi bar áli de. Bıylǵy jyly fılm toqtap turǵan kezde Almaty qalasy ákiminiń qoldaýymen «Bazıs A» kompanıasy 180 mln teńge qarjylaı kómek kórsetkenin aıta ketkim kelip otyr. Sonyń arqasynda jetistikke jetip otyrmyz. Endigi jetispeı otyrǵan qarjyny Mádenıet jáne sport mınıstrli bóledi degen úmitimiz bar. Búgingi nusqa prokatqa arnalǵan. Osy kıno versıany tolyqtyryp 16 jeltoqsanda usynamyz, sońynan 10 serıa birden kórsetiledi. Biraq, birde-bir telearnamen ázirge kelisim jasasqan joqpyz. Bireýi kelip, avtorlyǵyna biz ıe bolaıyq degen joq. Eshbirinen suranys túsken joq. Ulttyq kompanıalardyń birde-bireýinen kómek bolmady. Bul ashshy shyndyq. Qarapaıym halyq 1 mln teńge jınap berdi. Árıne, bul bir akterdiń jalaqysy ǵana. Degenmen, eldiń yqylasyn aıtyp ótpeı bolmaıdy. 1000 teńge bolsa da aýdarǵanyn kórdik. Fılm Almaty oblysynyń mańynda túsirildi», — dedi Rústem Ábdirashev.
Rejıserdiń aıtýynsha, fılmdegi akterlerdiń kıimi, saýyt-saımandary Qytaıda jasalǵan.
«Kıimderdi Qazaqstanda tiktik, saýyt-saıman, qarý-jaraq, at ábzelderin Qytaıda kınoǵa arnap qural-saıman ázirleıtin kompanıada jasattyq. Bolashaqta ondaı kompanıany ózimizde ashqymyz keledi», — dedi ol.
Fılm senarıin jazǵan jazýshy Smaǵul Elýbaev el kútken fılmniń qaǵazdaǵy nusqasyn túsirýge 4-5 aı ýaqyt ketkenin aıtty.
«İlıas Esenberlınniń «Almas qylysh» tarıhı romanyn ekrandaıyq degen Elbasynyń usynysynan keıin Tımýr Jaqsylyqov degen oryssha jazatyn talantty senarıst ekeýimiz 4-5 aıdaı otyryp daıyndadyq. Senarıge árıne, ózgerister engizildi. Biz jaǵzan nusqanyń 80 paıyzy ekrandaldy. Senarı daıyn bolǵannan keıin rejıser tańdaý máselesi úlken daý boldy. Sodan Rústemniń kandıdatýrasy ótip, mynadaı is jasaldy», — dedi Smaǵul Elýbaı.
