Reseiden qazaq ádebieti men baspasózi tarihyna qatysty qundy olja tabyldy. Qýanyshty habardy aqyn Serikbol Hasan jetkizdi. Aitýynsha, kórshi elge barǵan saparynda ol “Sadaq” jýrnalyn qarastyryp júrip, qoljazba túrde jaryq kórgen “Balapannyń” bir sanyn kezdestirgen, dep habarlaidy Dalanews.kz.
Aqynnyń sózinshe, súiinshi jańalyqty belgili ǵalym Dihan Qamzabekke aitqanda, ol bul derek týraly “Egemen Qazaqstan” gazetine jazyp berýin suraǵan.
"Búgin gazet birinshi betten bastap jarq etkizipti. Osy oraida jýrnaldyń Ombydan elge jetýine járdem bergen Qaiyrbek Kemeńger, Asqar Raisov, gazetke jariialaǵan Dihan aǵalarǵa jáne qazirgi qaripke aýdarǵan Abai Myrzaǵa alǵys aitamyn", – deidi Serikbol Hasan.
Onyń aitýynsha, “Balapan" qoljazba jýrnalynyń №9 sany goskatalog arqyly Omby memlekettik tarihi-ólketaný mýzeiiniń qorynan tabylǵan. Jýrnal avtorlary jazbalaryn "Sadaqtaǵy" sekildi qalam attarymen jazǵan.
"Bul nómirge Serkeniń "Kók tóbetke", "Qonǵan jerimnen", "Abylai" (áńgime), Babasannyń "Aqylsyz sulý", Politikanttyń “Men de politik bolaiynshy" t.b. jazbalary jariialanǵan eken. Jýrnaldyń “Sóz basy” aidarynda nómirde jariialanǵan jazbalarǵa ańdatpa jasalsa, sońyndaǵy “Basqarmadan” aidarynda basylmai qalǵan maqalalar men jazbalar týraly qosymsha habarlama berilipti", — deidi ol.
Aqyn atalǵan jýrnaldyń qysqasha tarihyny da toqtaldy.
"Aita keteiik, “Balapan” qoljazba jýrnaly 1916-1918 jyldary Ombydan shyǵyp turǵan. Shyǵarýshylary – “Birlik” uiymy, redaktory Qoshke Kemeńgeruly bolǵan. Osy ýaqytqa deiin jýrnaldyń birde-bir sany tabylmaǵan edi", - dep qosty aqyn.
Serikbol Hasannyń aitýynsha, tabylǵan bul nómir qazaqtyń qoljazba jýrnaldar tarihyn zertteýde qundy derekkóz bolmaq.
