Jetisý oblysy ákiminiń ókimimen Ulan Ǵalymuly Rysqul oblystyq dene shynyqtyrý jáne sport basqarmasynyń basshysy bolyp taǵaıyndaldy, dep habarlaıdy Dalanews.kz.

Belgili sportshy buǵan deıin de bul laýazymdy atqarǵan. Ol 2023 jyldyń 16 naýryzynda basshylyqqa kelip, 2024 jyly qyzmetinen bosatylǵan edi. Sol ýaqyttan beri basqarma basshysy orny bos turǵan.

Ulan Rysqul 1986 jyly dúnıege kelgen, birneshe joǵary bilimi bar. Ál-Farabı atyndaǵy Qazaq ulttyq ýnıversıtetinde quqyqtaný mamandyǵyn, D.A. Qonaev atyndaǵy kólik jáne quqyq gýmanıtarlyq ýnıversıtetinde qarjy salasyn, al Aımaqtyq áleýmettik-ınnovasıalyq ýnıversıtetinde dene shynyqtyrý jáne sport mamandyǵyn támamdaǵan.

Ol – dzúdodan Qazaqstannyń úsh dúrkin chempıony, Azıanyń eki dúrkin chempıony, álem kýbogynyń kúmis júldegeri, sondaı-aq qazaq kúresinen QR sport sheberi. Ulan Rysqul «Qazaqstan Barysy» týrnıriniń alǵashqy jeńimpazy retinde elge tanymal.

Eńbek jolyn Astanadaǵy Sport isteri komıtetinde bastap, ulttyq shtattyq komandada nusqaýshy-sportshy qyzmetin atqarǵan. Keıin túrli sporttyq uıymdarda basshylyq qyzmetterde bolǵan. Sonymen qatar, ol «Qazaq kuresi» halyqaralyq federasıasynyń bas hatshysy laýazymyn da atqarǵan.