Mundai dúnieler bir kúnde paida bolmaǵany anyq. Bul – quldyq sananyń nátijesi. Aitpaqshy, QR Parlamenti Májilisi depýtattarymen jáne «Qazaq tili» qoǵamy ókilderimen sóz talastyrǵan Samal esimdi jas kelinshektiń zaiyby áskeri adam eken. Qazirgi tańda áskeri salada qyzmet etip júrgenderdiń kópshiligi orys tiliniń múddesin qorǵap, soiylyn soǵýǵa daiyn turady.
Taiaýda bir tanysymyz aýyzashar dastarhanyn jaiyp, biraz adamnyń basyn qosty. Keń dastarhan basynda áskeri salada qyzmet etetin bir azamat ta boldy.
Áńgimeden áńgime shyǵyp, biyl elimizde áskeri sherýdiń ótkizilmeitinin jinalǵandardyń bári qoldap, áńgime qylysty. Budan keiin sóz aýany Uly Otan soǵysyna aýyp, «Bessmertnyi polk» áńgimege arqaý boldy.
Sol kezde álgi ofitser aǵamyz «Bessmertnyi polk» sherýin ótkizýdiń eshqandai sókettigi joq ekenin aityp, bul – Uly Otan soǵysynda mert bolǵan atalarymyzǵa kórsetilgen qurmet dep qabyldaitynyn aitty.
Áskeri adamnyń myna sózinen keiin kózi ashyq taǵy bir aǵamyz:
– Sońǵy jyldary Resei «Bessmertnyi polk» sherýin saiasilandyryp jiberdi. Qazaq úshin soǵys qundylyq bolmaýy kerek. Uly Otan soǵysy kezinde mert bolǵan atalarymyzdyń árýaǵyna Quran baǵyshtap, Jeńis kúni jeti shelpek pisirip eske alsaq jetip jatyr. Bul úshin «Bessmertnyi polk» sherýin ótkizýdiń qajeti joq, – dep jón sózdi aitty.
Biraq ómir boiy orystyń qarýyn ustap, solar jazyp bergen «ýstavpen» ómir súrgen ofitser aǵamyz aitqanynan qaitpady. Oǵan salsaq «Bessmertnyi polk» sherýin ótkize berýimiz kerek eken.
Biraq, aýyzasharǵa jinalǵandardyń kópshiligi áskeri azamattyń sózin qoldaǵan joq. Osylaisha dastarhan basynda az-kem pikir-talas ornaǵanyna kýá boldyq.
Jalyp, áskeri salada qyzmet etetin qazaq tildi ofitserlerdiń orysty jaqtap, olardyń qarýy Amerikanyń qarýynan kúshti ekenin aityp, daýlasa ketýge daiar turatyny jasyryn emes.
Elimizdi syrtqy jaýdan qorǵaidy degen kóptegen áskerilerdiń osylai oilaidy. Olarǵa orystyń propagandasy ótip ketken. Áskerdegi «álemjettik» olar úshin qalypty dúnie. Bul jaqsylyqtyń nyshany emes.
Búginde qazaq áskeriniń formasy ózgergenimen, ishki mazmuny sol kúiinde qalyp qoiǵan. Ministrden bastap, ofitserlerdiń bári orys tilinde buiryq berýge daiar turady.
Kúni keshe ǵana Qorǵanys ministri qazaq tilinde ejiktep maqal shyǵaryp, halyqtyń synyna ushyraǵanyna kýá boldyq. Búgin ulty qazaq ofitserleriniń áielderi Pýtinnen kómek suraýdan arlanbady. Buǵan keibir ofitserlerdiń «Bessmertnyi polk» sherýin ótkizýdi qalypty dúnie sanaitynyn qosyńyz. Al osydan qandai qorytyndy shyǵarýǵa bolady?
Bizdiń áskeri salada qyzmet etetin ofitserlerdiń oi-paiymyn ózgertýimiz kerek.
Eger mundai profilaktikalyq sharany júrgizbesek, Resei áskeri elimizdiń shetinen kirip kelse, qazaq ofitserleriniń áielderi qoldaryna gúl alyp, qaýanyshpen olardy qarsy alýy bek múmkin.
Sondyqtan áskeri salada ideologiialyq is-sharalardy kúsheitken abzal. Áskeri erejelerdi qazaq tiline aýdaryp qana qoimai, olardyń bárin qazaq rýhta qaita jazý qajet. Áskerilerdiń qoldanatyn kitaptary kóp emes, ary ketse, onshaqty kitap. Solardyń bárin qazaq tilinde jazyp shyǵýymyz kerek. Áitpese, mynadai ásker bizdi ushpaqqa shyǵarmaidy.
