Qytai kórermenderiniń nazaryn aýdaryp, tánti etken «Erjúrek aspan sardary» filmi Qytai kinoindýstriiasyndaǵy biylǵy jyldyń tabysty jobalarynyń biri boldy.
Qytaida turatyn qandasymyz Muhtar Tileýǵazyuly «Erjúrek aspan sardary» filminde Bairuń taipasynan shyqqan batyr rólin tamasha somdap shyǵady. Jibek joly boiyndaǵy tarihi oqiǵany baian etken film tartymdylyǵymen kórermendi baýraǵan. Osylaisha, bul týyndy Qytai kino tarihynda alǵashqy kúngi biletter satylymy boiynsha rekord jańartty.
Muhtar Tileýǵazyuly - Qytaidyń Ile qazaq avtonomiialyq oblysy, Kúnes aýdanynyń týmasy. Ol Qytaidyń eń áigili rejisserleriniń týyndylarynda bedeldi rólderde oinap, kórermenniń kóńilinen shyǵyp júr. Qazirgi kúni Qytaidyń patshalary men batyrlarynyń rólin somdaýshylar arasynda joǵary suranysqa ie akterlerdiń biri. Negizinen tarihi filmderge túsedi. Onyń juldyzyn jarqyratqan týyndy - Qytaidyń Lý Chan esimdi belgili rejisseriniń «Patshanyń qonaǵasy» filmi boldy. Bul tarihi filmde Muhtar Batys Han patshalyǵyn qurýǵa eńbek sińirgen ataqty sardar Fan Kýáidiń rólinde oinaidy. Kórermenge óziniń batyr kelbetimen, ártistik talantymen unaidy.
Akter 2013 jyly «Iań Gýifi» (Iań Gýifi - Qytai tarihyndaǵy eń ataqty tórt arýdyń biri bolǵan) filminde An Lýshan sardardyń rólin somdaidy. Osy sekildi tarihi filmderde jarqyrap kóringen, talantty qandasymyz sońǵy tórt jyldyń ózinde-aq jiyrmadan astam kinoǵa túsken. Muhtardyń ról somdaý barysyndaǵy ottai janǵan kóz janary, batyrlarǵa tán kelbeti, at ústindegi saiyskerlik óneri jurtqa unaǵan. Bul rólderdi tamasha somdaýy onyń qazaq aýylynda týyp, bala kezinen batyrlar jyryn tyńdap, at jalynda oinap óskeniniń arqasy.
