Qazaq Air áýe kompaniiasynyń ushqyshtary basqarma tóraǵasy Ádilbek Ómralievtiń atyna jazǵan ótinishinde ózderiniń tereń narazylyǵyn bildirdi, dep habarlaidy Dalanews.kz KazTAG agenttigine silteme jasap.
«Biz, ushqyshtar ujymy, sizge eńbekaqy tóleýdiń qoldanystaǵy júiesin qaita qaraýdy surap júginemiz. Sońǵy jyldary biz birneshe ret kompaniia múddesin eskerip, basshylyq bastamasymen jyldyq ushý normasyn 900 saǵatqa deiin ulǵaitý týraly kelisimge qol qoidyq; jazǵy maýsymda josparlanǵan demalystardan bas tartyp, óndiristik baǵdarlamanyń oryndalýyn qamtamasyz ettik; Crew Control suraýy boiynsha demalys kúnderi de qosymsha reister oryndaimyz; jumys kestesiniń turaqtylyǵyn saqtaý úshin is júzinde eńbek demalysy men aýrý demalysyn paidalanbaimyz. Soǵan qaramastan, búginde ujym ishinde eleýli narazylyq týdyrǵan jaǵdai qalyptasyp otyr»,- delingen Qazaq Air-diń qazirgi qyzmetkeri rastaǵan úndeýde.
Qujatta narazylyqtyń negizgi sebepteri kórsetilgen.
- Naqty jumys júktemesi
«Ortasha ailyq ushý ýaqyty 80 saǵat bolǵanymen, Q400 ushaǵyn basqaratyn pilottar aiyna shamamen 50 ret ushyp-qoný operatsiiasyn oryndaidy. Al dál osyndai ushý ýaqyty kezinde Boeing nemese Airbus ushqyshtary bar bolǵany 20–25 ret qana ushyp-qoný jasaidy. Belgili bolǵandai, ushý men qoný- ushqysh jumysynyń eń jaýapty ári kúrdeli kezeńderi, olar barynsha shoǵyrlanýdy jáne joǵary kásibilikti talap etedi. Demek, Q400 ushqyshtarynyń naqty jumys júktemesi basqa áýe kemelerine qaraǵanda edáýir joǵary, bul óz kezeginde sharshaýdyń artýyna jáne jumys qabiletiniń tómendeý qaýpiniń ósýine ákeledi»,- delingen hatta.
2. Eńbekaqy deńgeii
«Bizdiń kompaniiadaǵy ushqyshtardyń jalaqysy Qazaqstandaǵy ózge áýe kompaniialaryndaǵy áriptestermen salystyrǵanda eki esege jýyq tómen. Kóktemde júrgizilgen jalaqy ósimi jalpy tabysqa aitarlyqtai áser etken joq. Mundaǵy másele kóbirek tabý emes, eńbekaqynyń naryqtyq jaǵdaiǵa sai ádil tólenýinde»,- dep kórsetilgen úndeýde.
3. Kadrlyq másele
«Qazirgi komandirlerdiń basym bóligi zeinetaldy jasta. Al olardyń ornyn basýy tiis jas ekinshi ushqyshtar tómen jalaqy men motivatsiianyń bolmaýyna bailanysty basshylyq laýazymdarǵa umtylmaidy. Sonyń saldarynan tájiribeli ekinshi ushqyshtar básekege qabiletti jalaqy men jaqsy sharttar usynatyn basqa kompaniialarǵa ketip jatyr. Tek 2024–2025 jyldary kompaniiadan segiz komandir men segiz ekinshi ushqysh ketken, olardyń arasynda burynǵy bas ushqysh pen birneshe nusqaýshy bar. Bul - kompaniia úshin kadrlyq áleýetti álsiretip, ushý qaýipsizdigine teris áser etetin eleýli shyǵyn. Qazir kompaniiadaǵy ekinshi ushqyshtardyń kópshiligi – tájiribesi az jas mamandar, bul jańa komandirlerdi daiarlaýdy qiyndatady»,- delingen qujatta.
4. Komandirler eńbekaqysyndaǵy aiyrmashylyq.
«Jergilikti jáne sheteldik komandirlerdiń eńbekaqysynda aitarlyqtai aiyrmashylyq saqtalyp otyr. Alaida olardyń jaýapkershiligi men jumys kólemi birdei. Mundai tájiribe ujymdaǵy moraldyq ahýalǵa teris áser etip, jergilikti ushqyshtardyń yntasyn tómendetedi»,- deidi pilottar.
5. Túngi reisterge tólem.
«Qazaqstandaǵy jáne álemdegi barlyq áýe kompaniialarynda túngi reister bólek jáne joǵary tarifpen tólenedi. Al bizde «Túngi aýysym» júiesi qoldanylady, ol túngi ushýlardyń naqty ereksheligi men júktemesin eskermeidi»,- dep atap ótti ushqyshtar.
Osy aitylǵandarǵa súiene otyryp, olar kompaniia basshylyǵynan kelesi sharalardy qabyldaýdy surady:
- túngi reisterge aqy tóleý tásilderin qaita qaraý;
- áýe kemesi komandirleriniń eńbekaqysyn keminde 30%-ǵa arttyrý;
- ekinshi ushqyshtardyń eńbekaqysyn keminde 50%-ǵa arttyrý;
- barlyq ushqyshtar úshin ushý ýaqytyna tólenetin aqy mólsherin 30%-ǵa kóbeitý.
