Qazaq Air اۋە كومپانياسىنىڭ ۇشقىشتارى باسقارما ءتوراعاسى ادىلبەك ومرالييەۆتىڭ اتىنا جازعان وتىنىشىندە وزدەرىنىڭ تەرەڭ نارازىلىعىن ءبىلدىردى، دەپ حابارلايدى Dalanews.kz كازتاگ اگەنتتىگىنە سىلتەمە جاساپ.
«ءبىز، ۇشقىشتار ۇجىمى، سىزگە ەڭبەكاقى تولەۋدىڭ قولدانىستاعى جۇيەسىن قايتا قاراۋدى سۇراپ جۇگىنەمىز. سوڭعى جىلدارى ءبىز بىرنەشە رەت كومپانيا مۇددەسىن ەسكەرىپ، باسشىلىق باستاماسىمەن جىلدىق ۇشۋ نورماسىن 900 ساعاتقا دەيىن ۇلعايتۋ تۋرالى كەلىسىمگە قول قويدىق؛ جازعى ماۋسىمدا جوسپارلانعان دەمالىستاردان باس تارتىپ، وندىرىستىك باعدارلامانىڭ ورىندالۋىن قامتاماسىز ەتتىك؛ Crew Control سۇراۋى بويىنشا دەمالىس كۇندەرى دە قوسىمشا رەيستەر ورىندايمىز؛ جۇمىس كەستەسىنىڭ تۇراقتىلىعىن ساقتاۋ ءۇشىن ءىس جۇزىندە ەڭبەك دەمالىسى مەن اۋرۋ دەمالىسىن پايدالانبايمىز. سوعان قاراماستان، بۇگىندە ۇجىم ىشىندە ەلەۋلى نارازىلىق تۋدىرعان جاعداي قالىپتاسىپ وتىر»،- دەلىنگەن Qazaq Airء-دىڭ قازىرگى قىزمەتكەرى راستاعان ۇندەۋدە.
قۇجاتتا نارازىلىقتىڭ نەگىزگى سەبەپتەرى كورسەتىلگەن.
- ناقتى جۇمىس جۇكتەمەسى
«ورتاشا ايلىق ۇشۋ ۋاقىتى 80 ساعات بولعانىمەن، Q400 ۇشاعىن باسقاراتىن پيلوتتار ايىنا شامامەن 50 رەت ۇشىپ-قونۋ وپەراسياسىن ورىندايدى. ال ءدال وسىنداي ۇشۋ ۋاقىتى كەزىندە Boeing نەمەسە Airbus ۇشقىشتارى بار بولعانى 20–25 رەت قانا ۇشىپ-قونۋ جاسايدى. بەلگىلى بولعانداي، ۇشۋ مەن قونۋ- ۇشقىش جۇمىسىنىڭ ەڭ جاۋاپتى ءارى كۇردەلى كەزەڭدەرى، ولار بارىنشا شوعىرلانۋدى جانە جوعارى كاسىبيلىكتى تالاپ ەتەدى. دەمەك، Q400 ۇشقىشتارىنىڭ ناقتى جۇمىس جۇكتەمەسى باسقا اۋە كەمەلەرىنە قاراعاندا ەداۋىر جوعارى، بۇل ءوز كەزەگىندە شارشاۋدىڭ ارتۋىنا جانە جۇمىس قابىلەتىنىڭ تومەندەۋ ءقاۋپىنىڭ وسۋىنە اكەلەدى»،- دەلىنگەن حاتتا.
2. ەڭبەكاقى دەڭگەيى
«ءبىزدىڭ كومپانياداعى ۇشقىشتاردىڭ جالاقىسى قازاقستانداعى وزگە اۋە كومپانيالارىنداعى ارىپتەستەرمەن سالىستىرعاندا ەكى ەسەگە جۋىق تومەن. كوكتەمدە جۇرگىزىلگەن جالاقى ءوسىمى جالپى تابىسقا ايتارلىقتاي اسەر ەتكەن جوق. مۇنداعى ماسەلە كوبىرەك تابۋ ەمەس، ەڭبەكاقىنىڭ نارىقتىق جاعدايعا ساي ءادىل تولەنۋىندە»،- دەپ كورسەتىلگەن ۇندەۋدە.
3. كادرلىق ماسەلە
«قازىرگى كومانديرلەردىڭ باسىم بولىگى زەينەتالدى جاستا. ال ولاردىڭ ورنىن باسۋى ءتيىس جاس ەكىنشى ۇشقىشتار تومەن جالاقى مەن موتيۆاسيانىڭ بولماۋىنا بايلانىستى باسشىلىق لاۋازىمدارعا ۇمتىلمايدى. سونىڭ سالدارىنان تاجىريبەلى ەكىنشى ۇشقىشتار باسەكەگە قابىلەتتى جالاقى مەن جاقسى شارتتار ۇسىناتىن باسقا كومپانيالارعا كەتىپ جاتىر. تەك 2024–2025 جىلدارى كومپانيادان سەگىز كوماندير مەن سەگىز ەكىنشى ۇشقىش كەتكەن، ولاردىڭ اراسىندا بۇرىنعى باس ۇشقىش پەن بىرنەشە نۇسقاۋشى بار. بۇل - كومپانيا ءۇشىن كادرلىق الەۋەتتى السىرەتىپ، ۇشۋ قاۋىپسىزدىگىنە تەرىس اسەر ەتەتىن ەلەۋلى شىعىن. ءقازىر كومپانياداعى ەكىنشى ۇشقىشتاردىڭ كوپشىلىگى – تاجىريبەسى از جاس ماماندار، بۇل جاڭا كومانديرلەردى دايارلاۋدى قيىنداتادى»،- دەلىنگەن قۇجاتتا.
4. كومانديرلەر ەڭبەكاقىسىنداعى ايىرماشىلىق.
«جەرگىلىكتى جانە شەتەلدىك كومانديرلەردىڭ ەڭبەكاقىسىندا ايتارلىقتاي ايىرماشىلىق ساقتالىپ وتىر. الايدا ولاردىڭ جاۋاپكەرشىلىگى مەن جۇمىس كولەمى بىردەي. مۇنداي تاجىريبە ۇجىمداعى مورالدىق احۋالعا تەرىس اسەر ەتىپ، جەرگىلىكتى ۇشقىشتاردىڭ ىنتاسىن تومەندەتەدى»،- دەيدى پيلوتتار.
5. تۇنگى رەيستەرگە تولەم.
«قازاقستانداعى جانە الەمدەگى بارلىق اۋە كومپانيالارىندا تۇنگى رەيستەر بولەك جانە جوعارى تاريفپەن تولەنەدى. ال بىزدە «تۇنگى اۋىسىم» جۇيەسى قولدانىلادى، ول تۇنگى ۇشۋلاردىڭ ناقتى ەرەكشەلىگى مەن جۇكتەمەسىن ەسكەرمەيدى»،- دەپ اتاپ ءوتتى ۇشقىشتار.
وسى ايتىلعاندارعا سۇيەنە وتىرىپ، ولار كومپانيا باسشىلىعىنان كەلەسى شارالاردى قابىلداۋدى سۇرادى:
- تۇنگى رەيستەرگە اقى تولەۋ تاسىلدەرىن قايتا قاراۋ؛
- اۋە كەمەسى كومانديرلەرىنىڭ ەڭبەكاقىسىن كەمىندە 30%-عا ارتتىرۋ؛
- ەكىنشى ۇشقىشتاردىڭ ەڭبەكاقىسىن كەمىندە 50%-عا ارتتىرۋ؛
- بارلىق ۇشقىشتار ءۇشىن ۇشۋ ۋاقىتىنا تولەنەتىن اقى مولشەرىن 30%-عا كوبەيتۋ.
