2024 jylǵy qazan aiynda Ulttyq bank Ulttyq qordan 1,4 mlrd AQSh dollaryna deiingi mólsherde valiýta shyǵaryp, satpaqshy. Bul týraly búgin Ulttyq banktiń qyrkúiektegi valiýta naryǵyndaǵy hal-ahýaly jóninde jariialaǵan esebinde kórsetilgen, dep habarlaidy Dalanews.kz.
Ulttyq bank málimetinshe, qyrkúiek aiynyń qorytyndysy boiynsha 1 AQSh dollarynyń ulttyq valiýtaǵa shaqqandaǵy baǵamy 481,11 teńgeni qurap, teńge 0,1%-ǵa nyǵaidy. Qazaqstan qor birjasyndaǵy saýda-sattyqtyń ortasha kúndik kólemi bir aida 210 mln AQSh dollarynan 221 mln AQSh dollaryna deiin artty. Saýda-sattyqtyń jalpy kólemi 4,7 mlrd AQSh dollaryn qurady.
"Respýblikalyq biýdjetke transfertterdi qamtamasyz etý úshin qyrkúiekte Ulttyq qordan 945 mln AQSh dollaryna valiýta satyldy. Ulttyq qordan satý úlesi jalpy saýda-sattyq kóleminiń 20%-yn jáne kúnine 45 mln AQSh dollarynan aspaityn mólsherdi qurady. Ulttyq bank Ulttyq qordyń qarajatymen operatsiialar júrgizý kezinde naryqtyń beitarap qaǵidatyn saqtaidy. Bul shetel valiýtasyn udaiy jáne birkelki satýdy bildiredi. Mundai tájiribe Ulttyq qor operatsiialarynyń valiýta naryǵyna áserin barynsha azaitýǵa múmkindik beredi", delingen resmi habarlamada.
Ulttyq bank BJZQ zeinetaqy aktivteriniń valiýtalyq úlesin 40%-ǵa deiin ulǵaitý maqsatynda qyrkúiekte birjalyq saýda-sattyqta shetel valiýtasyn satyp alý operatsiiasyn jalǵastyrdy. Onyń jalpy somasy 500 mln AQSh dollaryn nemese naryqtyń jalpy kóleminiń shamamen 11%-yn qurady.
"Ulttyq qorǵa "Qazatomónerkásip" AQ-tyń aktsiialaryn satyp alý týraly Úkimet sheshimin iske asyrý aiasynda Ulttyq bank shildede Ulttyq qordaǵy valiýtalyq aktivterdiń bir bóligin satý arqyly altyn-valiýta rezervterine konvertatsiialady. Naryqtyń beitarap qaǵidatyn saqtap, osy operatsiiany valiýta naryǵyna shyǵarý úshin Ulttyq bank shilde aiynyń ortasynan bastap satyp alynǵan kólemdi birkelki satýǵa kiristi", - deidi ortalyq retteýshi organ.
Atalǵan operatsiia aiasynda Ulttyq banktiń altyn-valiýta rezervterinen satý kólemi qyrkúiekte 241,5 mln AQSh dollaryn qurady. 2024 jylǵy qazanda 240 mln AQSh dollarynan 260 mln AQSh dollaryna deiingi mólsherde altyn-valiýta rezervterinen valiýta satyp alý kútilýde.
"Respýblikalyq biýdjetke transfert bólýge Úkimettiń aldyn ala boljamdy ótinimderi boiynsha 2024 jylǵy qazanda Ulttyq bank Ulttyq qordaǵy 1,3 mlrd AQSh dollarynan 1,4 mlrd AQSh dollaryna deiingi mólsherdegi valiýtany satýdy kózdeidi. 2024 jylǵy qazanda BJZQ zeinetaqy aktivteriniń valiýtalyq úlesin ustap turý úshin 850 mln AQSh dollarynan 950 mln AQSh dollaryna deiingi mólsherde valiýta satyp alý josparda bar", - dep túsindiredi muny Ulttyq banktiń baspasóz qyzmeti.
