Astanada aýdanaralyq qylmystyq ister jónindegi sotta Qairat Satybaldyulyna qatysty basty sot otyrysy bastaldy, - dep habarlaidy Dalanews.kz.
Bul joly Satybaldyuly qylmystyq jolmen alynǵan aqshany zańdastyrý (jylystatý) boiynsha aiyptalyp otyr.
Qairat Satybaldyulynyń ózi sot zalynda joq. Ol protseske onlain qosylýy kerek edi, biraq tehnikalyq aqaýlarǵa bailanysty múmkin bolmady. Osyǵan bailanysty sot úzilis jariialady.
Eske salaiyq, 2022 jyly naýryzda Satybaldyuly shetelge qashyp bara jatqan jerinen ustalǵan bolatyn.
Al qyrkúiekte Astanada soty Qairat Satybaldyulyn alty jylǵa bas bostandyǵynan aiyrýǵa úkim shyǵardy, onyń múlki tárkilendi jáne 10 jyl boiy memlekettik qyzmette jumys isteýge tyiym salyndy. Sot barysynda Satybaldyuly "Qazaqtelekom" jáne "Kólik servis ortalyǵy" kompaniialaryna zalaldy óteý retinde ondaǵan milliard teńge tólegeni málimdeldi. Taraptar mediativtik kelisim jasasty.
2023 jyly jeltoqsanda Qairat Satybaldyuly 55 milliard teńgeden asa aqshany memleketke qaitarǵan bolatyn. Antikor Qairat Satybaldyulyna jáne basqa da adamdarǵa qatysty júrgizilip jatqan tergeý sheńberinde elden zańsyz shyǵarylǵan aktivterdi, onyń ishinde qylmystyq jolmen alynǵan aqshany jáne ózge de múlikti qaitaryp jatqanyn habarlaǵan bolatyn.
Biyl aqpanda Satybaldyulyna qatysty sotqa deiingi tergeý amaldary aiasynda biýdjetke taǵy da shamamen 82,6 milliard teńge (185 mln AQSh dollary) tústi. Odan bólek Aqmola oblysynyń Qosshy qalasyndaǵy 942 gektar jer ýchaskesi memleketke qaitaryldy. Onyń naryqtyq quny 13 milliard teńgeden asady.
