"Báiterek" holdingi Almatyda ótken "Qairat" – "Real Madrid" matchynyń biletterin ujym bolyp satyp aldy degen aqparatty joqqa shyǵardy, dep habarlaidy Dalanews.kz.
Kompaniia málimetinshe, biletter biýdjet qarjysyna da, korporativtik nemese basqa da qarajat esebinen alynbaǵan.
“Qyzmetkerlerdi jappai uiymdastyryp aparý bolǵan joq. Biletterdi ortalyqtan satyp alý da júrgizilmedi. Match ótken kúni eshkimge jumystan arnaiy demalys berilgen joq”, – delingen habarlamada.
Eske salaiyq, buǵan deiin Májilis depýtaty Baqytjan Bazarbek Almatyda ótken "Qairat" – "Real Madrid" kezdesýine qatysty pikir bildirgen edi.
Bazarbek matchqa shamamen 5000 biletti "Samuryq-Qazyna", "Báiterek" holdingteri men ulttyq kompaniialar qyzmetkerleriniń satyp alǵany týraly aqparatty tekserýdi talap etti.
"Eger bul rastalsa, onda zańdy suraq týyndaidy: biletter jekelegen qyzmetkerlerdiń jeke qarajatyna alyndy ma, álde memlekettik resýrstar jumsaldy ma? Biýdjet qarajatyn mundai maqsatqa paidalaný múlde jol berilmeitin nárse!", – dedi ol.
Sondai-aq depýtat quqyq qorǵaý jáne antimonopoliialyq organdardy bilet satylymyndaǵy yqtimal alypsatarlyq shemalardy tekserýge, olardy kóterme satyp alǵan tulǵalar men kompaniialardy anyqtap, jaýapqa tartýǵa shaqyrdy.
"Asa qymbat baǵaǵa bilet alǵan adamdar adaldyq pen ashyqtyqty kórýge tiis, qoldan jasalǵan tapshylyq pen kúmándi shemalardy emes", – dep túiindedi Baqytjan Bazarbek.
