QR Parlamenti Májilisiniń dálizinde Qarjy monitoringi agenttigi tóraǵasynyń orynbasary Jeńis Elemesov kásipker Qairat Boranbaevqa qatysty búginderi qandai tergeýler sharalary júrgizilip jatqandyǵy týraly jýrnalisterdiń qoiǵan suraǵyna jaýap berdi, dep jazady Dalanews.kz.
Jýrnalister buǵan deiin Boranbaevtyń biýdjet qarajatyn urlap, salyq tóleýden jaltarý boiynsha kúdikke ilingenin sózge tiek etti.
"Qazirgi ýaqytta oǵan qatysty qarastyrylyp jatqan qylmystyq ister joq. Barlyq qylmystyq ister sońyna jetken. Salyq tóleýden jaltarý máselesine keletin bolsaq, ol zalal somasyn tolyǵymen ótegendikten, bizdegi Qylmystyq kodekstiń normasyna sáikes, ondaida qylmystyq isti toqtatý talap etiledi", – dedi Elemesov.
Osylai degen QMA ókili Qairat Boranbaevqa qatysty sotta da qarastyrylyp jatqan eshqandai is joq ekenin naqtylady.
Aita ketsek,2023 jyly Qairat Boranbaev asa iri mólsherde memleket qarajatyn urlady jáne qylmystyq kiristerdi zańdastyrdy degen kúdikpen ustaldy. Tergeý derekteri boiynsha, 2019 jyly ol óz ieligindegi "AziiaGaz Shonjy" JShS arqyly gaz jetkizý kezinde QazaqGaz ulttyq kompaniiasynyń qarajatyn jymqyrdy, keiinnen urlanǵan 14,5 mlrd teńge mólsherindegi qarajat zańdy kásipkerlik qyzmetten alynǵan qusap dividendterdi bólý jáne tóleý túrinde zańdastyrylǵan. "Tergeý barysynda keltirilgen zalal tolyq kólemde óteldi", delingen QMA habarlamasynda.
Agenttik zańsyz kirister esebinen satyp alynǵan sheteldik aktivterdi belgileý jáne buǵattaý jumystaryn júrgizip jatqany da aityldy.
Keiinnen ol kóptegen aktivin memleketke qaitara bastady. Mysaly, byltyr qarashada Qairat Boranbaevpen bailanysty Qaraǵandydaǵy farmatsevtikalyq zaýyt biýdjetke 105 million teńgeni qaitardy. Bul aqsha buryn "Spýtnik V" vaktsinasynyń paidalanylmaǵan dozalary úshin bólingen. Sol sekildi "AziiaGaz Shonjyny" Samuryq-Qazyna qory ielegine ótti. Sondai-aq Qairat Boranbaevqa tiesili, quny 35 mlrd teńge bolatyn Phystech II munai kompaniiasy tolyǵymen memleket balansyna ótti.
Osylaisha túrli isterden basyn ábden arshyp alǵan Qairat Boranbaevtyń 2024 jyly qarashada buryn ózi basshylyq etken "Qairat" fýtbol klýbyna oralǵany belgili boldy.
