«Qazaqmys» korporasıasynda Q.I. Satbaev atyndagy Jezqazgan tau-ken ondirisi Ońtústik Jezqazǵan, Shyǵys Jezqazǵan kenishteriniń jáne «Batys» kenishiniń eńbek ujymymen jumys kezdesýi ótti. Kóshpeli keńesti basqarma tóraǵasynyń óndiris jónindegi orynbasary Saıat Bakırov ótkizdi, dep habarlaıdy Dalanews.kz.
Kezdesýde eńbek qaýipsizdigi, ınvestısıa jáne óndiristik áleýetti arttyrý máseleleri talqylandy. Ujymǵa kompanıanyń jáne kompanıaǵa qatysy bar aımaqtardyń bolashaqtaǵy damý strategıasy tanystyryldy.
Eńbekti qorǵaý jáne ónerkásiptik qaýipsizdik máselelerine erekshe nazar aýdaryldy. Qazirgi óndiristik táýekelder men olardy azaıtý sharalary qarastyryldy. Qaýipsizdikti basqarý úshin júıeli jáne ujymdyq áreket, sondaı-aq árbir jumysshynyń jeke jaýapkershiligi talap etiledi. Bul qaǵıdalar 2026 jyly kompanıada júzege asyrylyp jatqan jańartylǵan Óndiristik qaýipsizdik jáne eńbekti qorǵaý strategıasynda bekitilgen.
Jezqazǵan óńiriniń kenishteri jyldy oń dınamıkamen bastaǵany atap ótildi. Buǵan ótken jyldyń sońynda jabdyqtarǵa júrgizilgen aýqymdy jóndeý jumysy yqpal etti.
Geologıalyq barlaý salasyna basymdyq berildi. 2026 jylǵa arnalǵan ınvestısıa maquldandy. Atap aıtqanda, shamamen 78 myń qýma metr kóleminde jer ústi burǵylaý jumysyn júrgizý josparlanǵan. Bul 90 jyldan astam ýaqyt boıy ıgerilip kele jatqan Jezqazǵan ken ornyndaǵy sarqylǵan óndiristik qýatty tolyqtyrýǵa jáne jańa qorlardy ashýǵa múmkindik beredi.
2026-2027 jyldary Ońtústik Jezqazǵan, Shyǵys Jezqazǵan jáne Batys kenishterinde jer ústi ınjenerlik komýnıkasıalaryn aýystyrý qarastyryldy. Bul shamamen 7 mln tonna kendi ıgerýge múmkindik berip, geomehanıkalyq jaǵdaıdy turaqtandyrýǵa jaǵdaı jasaıdy.
Sonymen qatar óndiristik qýatty qoldaý men damytýǵa arnalǵan ınvestısıalyq paket maquldandy. Qarajat taý-ken shahtalyq tehnıka parkin jańartýǵa baǵyttalady. 40 ózdiginen júretin tehnıka satyp alý josparlanyp otyr, sondaı-aq qoldanystaǵy mashınalar men stasıonarlyq jabdyqtardy jóndeý jáne jańǵyrtý kózdelgen. Jomart, Jylandy jáne Nurqazǵan kenishterinde kúrdeli taý-ken jumysyn júrgizý josparlanýda.
Kezdesý sońynda jumyskerler jer astyndaǵy radıobaılanysty jańartý, ózdiginen júretin jáne relstik kólikterdi jańǵyrtý, sondaı-aq burǵylaý jabdyǵyn jóndeý máselelerin kóterdi. Usynystardyń bir bóligi ınvestısıalyq baǵdarlama aıasynda júzege asyrylatyn boldy, al jekelegen másele boıynsha sheshim tehnıkalyq aýdıt qorytyndysy boıynsha qabyldanady.
