Belgili ázilkesh Qairat Ádilgerei áleýmettik jelide kúi atasy Qurmanǵazy Saǵyrbaiuly týraly aitqan pikiri úshin keshirim surady, dep habarlaidy Dalanews.kz.
“Keiingi bir-eki kúnde áleýmettik jelide Qurmanǵazy atamyz týraly aitqan pikirim qatty talqyǵa túsip jatyr. Tipti Oral qalasynyń aqsaqal alqabileri jinalyp, osy videodaǵy aitylǵan sózge narazylyq bildirip, tipti meni sotqa bermek eken. Osy rette men ózimniń qateligimdi moiyndaimyn. Bul osydan úsh-tórt jyl buryn podkastta aitylǵan áńgime bolatyn”, - deidi ol.
Ázilkesh tarihi oryndardy aralap, babalar rýhyna Quran baǵyshtaýdy dástúrge ainaldyrǵanyn atap ótti.
“Jalpy men ózim júrgen jerde babalardyń basyna baryp, arýaqtaryna Quran baǵyshtap, tarihi jerlerdi aralaǵandy jaqsy kóremin. Kez kelgen tarihi jerde shyraqshy, ekskýrsovod, iaǵni tarihshy bolady. Men bul áńgimeni sondai babamyzdyń basyndaǵy shyraqshynyń óz aýzynan estigenmin”, - dedi ol.
Ol podkast barysynda estigen aqparatty jastar tilimen erkin ári dóreki formatta jetkizgenin alǵa tartty.
“Ony men moiyndaimyn, ol meniń úlken bir qateligim. Ózderińiz biletindei, podkast óte erkin formatta júrgiziletin suhbat. Sondyqtan ózimdi kishkene erkinsip, emotsiiaǵa berilip, osy bir estigen aqparatymdy qate, durys emes jetkizdim”, - dep qosty ol.
Sondai-aq ol aqsaqaldardyń talabyn oryndaýǵa daiyn ekenin aityp, 15 aqpanda Astrahan óńirine baryp, Qurmanǵazy babanyń basyna ziiarat jasap, Quran baǵyshtaitynyn málimdedi.
“Osy eki-úsh kúnde Pavlodar aýylyna, iaǵni aýdanyna baryp, babamyzdyń basyna Quran baǵyshtap, sol jerdegi barlyq jaǵdaidy, maǵlumatty, málimetti sizderge túsindiremin. Súrinbeitin tuiaq, jańylmaityn jaq joq deidi. Sizderden keshirim ótinemin jáne babamyzdyń basyna barǵan kezde taǵy da tolyqqandy videony sizderge túsirip jetkizemin”, - dedi ol.
Aita keteiik, buǵan deiin kásipker Ahmetbek Nursila ázilkesh Qairat Ádilgereidiń Qurmanǵazy Saǵyrbaiulyna qatysty aitqan pikirin synǵa alǵan edi.
Daýdyń týýyna ázilkeshtiń Qurmanǵazy týraly kino túsirý taqyrybynda aitqan pikiri sebep bolǵan. Onyń sózinshe, tarihi tulǵalardy tek bir qyrynan ǵana emes, basqa qyrynan da ashyp kórsetý kerek. Osy oidy jetkizý barysynda ol Qurmanǵazynyń ómirine qatysty daýly sipattamalar aitqan.
Ahmetbek Nursila bul pikirge jaýap berip, mundai málimdemelerdi orynsyz dep baǵalady. Ol tanymal tulǵalardyń sahnaǵa shyǵyp, kinoǵa túsip, toi júrgizip júrgenin atap ótip, qoǵam aldynda jaýapkershilik bolýy keregin aitty.
Sondai-aq kásipker Qurmanǵazynyń esimine qatysty aitylǵan sózder úshin quqyqtyq baǵa berý qajet ekenin málimdep, bul máseleni qoǵamdyq deńgeide talqylaýǵa shaqyrdy.
