Qaskeleńde ótken jyldyń jazynda 11 jastaǵy balaǵa shabýyl jasaǵan itterdiń iesine qatysty sot protsesi bastaldy. Itterdiń shabýylynan bala aýyr jaraqat alǵan, dep habarlaidy dalanews.kz KTK telearnasyna silteme jasap.
Prokýratýranyń málimetinshe, aiyptalýshy itteriniń qaýipti ekenin bile tura, olardy qaýipsiz qorshaýmen qamtamasyz etpegen jáne janýarlardy tiisti deńgeide baqylamaǵan. Sonyń saldarynan 11 jastaǵy bala basynan, betinen jáne denesiniń túrli jerinen aýyr jaraqat alǵan. Itterdiń shabýylyn oqiǵa ornynan ótip bara jatqan azamat toqtatyp, eki itti pyshaqtap óltirgen.
Jábirlenýshiniń anasy Ekaterina Býrmistrovanyń aitýynsha, qaiǵyly oqiǵadan keiin ulynyń minez-qulqy túbegeili ózgergen.
«Maǵan habarlasyp, itterdiń ulymdy talap tastaǵanyn aitty. Oqiǵa ornyna jetkende qanǵa boialǵan balamdy kórdim. Sol kúnnen keiin Maksim tuiyqtalyp qaldy, denesindegi tyrtyqtardan uialady. Oǵan taǵy bir plastikalyq ota jasaý qajet», – dedi ol sot barysynda.
Al itterdiń iesi óz kinásin moiyndamai otyr. Onyń sózinshe, balalar ózderi itterdi arandatqan, al kúshikter mundai aýyr jaraqat salýy múmkin emes.
Jábirlenýshi tarap sottan it iesinen shamamen 4,5 million teńge kóleminde materialdyq shyǵyndy, sondai-aq 10 million teńge moraldyq ótemaqy óndirýdi talap etti.
