Qasymov: "Lańkester Siriiadan basqarylǵan"
Bir mezette otbasylarynan bezip, ushty-kúili joǵalǵan 45 sodyr Aqtóbeniń qaq ortasyndaǵy páterge jinalyp jihadqa ázirlengen. Jetekshileri týystarymen sóilesýge tyiym salyp barlyǵyna uialy telefondaryn sol jerge qaldyrtypty. Alaida kútpegen jerden 20 ásiredinshil úiden shyǵa bere, «qasietti soǵysqa» qatysýdan bas tartyp, taiyp turǵan.
Aralarynan jik shyqqan taǵy úsheýi jolshybai, ajaldan qoryqqan taǵy biri qarý-jaraq dúkenine kirmei qasha jónelgen. Qalǵan 25-i ishke basa-kóktep kirip, jolyna kedergi bolǵandarǵa oqty qarsha boratqan. Eki birdei qarý-jaraq dúkenin tonap, keiin avtobýspen áskeri bólimge basyp kirgen radikaldar kameraǵa túsip qalǵany belgili. Osy baqylaý kamerasynyń kómegimen qandy qylmystyń betin ashqan politsiia terroristerdiń jihad jasaýǵa tapsyrmany Siriiadan alǵanyn aityp otyr.
– 45 adam páterde otyryp Siriialyq imamnyń aýdiotaspaǵa jazylǵan úndeýin tyńdaǵan. Sol ideolog jihadty dál 5-shi maýsym kúni jasaýdy buiyrǵan. Ýaǵyzdan soń sodyrlar birden «qasietti soǵysqa» shyqqan, – deidi QR Ishki ister ministri Qalmuhanbet Qasymov.
Ramazan aiynda qasietti soǵysqa shyqqandardyń 18-niń kózi joiylyp, 9-y tiridei tutqyndalǵan. Qolǵa túskenderdiń 12-i buǵan deiin adam óltirip, kisi tonap,túrmege otyryp shyqqany anyqtalǵan. Ishinde 2011-shi jyly Aqtóbedegi oblystyq Ulttyq qaýipsizdik komitetindegi jarylysqa qatysy bar dep tanylyp, 3 jyl jazasyn ótep shyqqan jigit te bar. 3 áskeri men 5 beibit turǵyndy jer jastandyryp, eldi dúrliktirgen lańkestermen tártip saqshylary týra 7 kún boiy atysty. Endi osy operatsiia kezinde olqylyq jibergen laýazymdy shendiler de jaýapkershilikke tartylýy múmkin.
– Óz ishimizde jinalys ótkizip, kimderdiń kemshilik jibergenin anyqtaimyz. Ishki ister ministrliginiń keibir qurylymdaryna, sonyń ishinde patrýldy politsiianyń qyzmetine qatysty suraq kóp. Olarǵa qandai shara qoldanǵanyn aldaǵy ýaqytta aitamyz, – dedi Qalmuhanbet Qasymov.
Aqtóbeni qanǵa bóktirip, Qazaqstanda halifat ornatqysy keletinderdiń salafitter ekenin prezidenttiń ózi málimdegen. Saqal qoiyp, balaq keskenderdiń jat aǵymyna endi zańmen tyiym salynbaq. Qazir elimizde osy teris baǵytty ustanatyn 15 myńnan astam adam bar.
Munaily qalanyń berekesin qashyrǵan lańkestik boiynsha, 25-ten astam qylmystyq is qozǵalǵan. Qazir tiridei qolǵa túsken radikaldarmen qatar jihad jasaýdan bas tartqan olardyń sybailastary Ulttyq qaýipsizdik komitetiniń tergeýshilerine jaýap berip jatyr. Al arnaiy operatsiiany Astanada otyryp baqylaǵan Ishki ister ministri ishki kóshi-qon men adamdardy ústi-ústine tirkep páterin jalǵa beretindermen de kúresti kúsheitpek.
Erbol Seiilhan
