Prezident Ulttyq mýzeidegi óner týyndylary kórmesin tamashalady dep habarlady, Memleket basshysynyń baspasóz-qyzmeti. Prezidentke ónertanýshy Olga Batýrina qazaqstandyq talantty qylqalam sheberleriniń týyndylary jinaqtalǵan «Dala keskindemesi: rámizder, boiaýlar, beineler» atty kórmeni tanystyrdy.
Onyń aiasynda Qasym-Jomart Toqaev áigili italiialyq sýretshi Leonardo da Vinchidiń «Ádemi hanshaiym» (La bella principessa) kartinasynyń túpnusqasyn da kórdi. Tanymal týyndynyń kórmesi Ulttyq mýzeidiń 10 jyldyǵyna orai Italiianyń «Scripta Maneant» baspasymen birlese uiymdastyrylǵan. Joǵary Renessans dáýirine jatatyn bul qundy jádiger Eýropadan tysqary jerge alǵash ret shyǵarylyp otyr.
Kórme elimizdiń Mádeniet jáne aqparat ministrliginiń, Italiianyń Qazaqstandaǵy elshiliginiń jáne Italiia mádeniet institýtynyń qoldaýymen ótip jatyr.
Elorda turǵyndary men qonaqtary Leonardo da Vinchidiń osynaý biregei týyndysyn 4 tamyzǵa deiin tamashalai alady.
Kórmeniń bizde ótýine ForteBank muryndyq boldy.
«ForteBank atynan biz Leonardo Da Vinchidiń «La Bella Principessa» kartinasyn Qazaqstanǵa ákelýge kómektesken demeýshilerdiń biri bolǵanymyzdy maqtan tutamyz. Italiianyń Qazaqstandaǵy elshisi Alberti myrza ótken qyrkúiekte bul ideiamen bólisken edi. Biz ForteBank atynan bul usynysty estigen boida qoldadyq. Kóptegen jyldar boiy biz mádeniet, óner jobalaryn qoldap kelemiz. 2006 jyldan bastap bizdiń Astanadaǵy bas keńsemizde Kulanshi Art Space kórmesi jumys istep keledi. Osy jyldar ishinde galereiada qazaqstandyq jáne sheteldik sýretshilerdiń jumystary qoiyldy. Deńgeii biik «La Bella Principessa» kartinasyn elge ákelý ońai bolmady. Leonardo da Vinchi óz zamanynyń geniii" - dedi, baspasóz máslihaty barysynda ForteBank basqarýshy direktory Áliia Esjan.
La Bella Principessa - 15 ǵasyrdyń aiaǵynda Leonardo da Vinchi salǵan italiandyq aqsúiekterge jatatyn jas qyzdyń portreti. Joǵalyp ketip, qaita tabylǵan týyndy sheberdiń eń jumbaq ári tartymdy týyndylarynyń biri. Buǵan deiin kartina álem boiynsha bes ret qana qoiylyp, kópshiliktiń úlken qyzyǵýshylyǵyn týdyrǵan edi.
Uiymdastyrýshylar barlyq elorda turǵyndary men qonaqtaryn Leonardo da Vinchidiń sirek týyndysyn baǵalaý úshin kórmege shaqyrady.
