Urlanǵan qarajatty zańdy aınalymǵa tartqan Ánýarbek Jeksenǵalıev múlki tárkilenip, 6 jylǵa jáne 8 aıǵa bas bostandyǵynan aıyryldy, - dep habarlaıdy Dalanews.kz.

Qylmystyq tabys somasy 4,3 mıllıard teńge bolady.

"Qarjylyq tergeý nátıjesinde qylmystyq aktıvterdi jylystatýdyń kúrdeli shemasy zertteldi. Jeksenǵalıev memlekettik búdjettiń 1,1 mıllıard teńgesin jymqyryp, ony baqylaýyndaǵy jalǵan qurylǵan kásiporyndardyń shottaryna aýdarý jolymen zańdastyrǵany anyqtaldy", - dep jazylǵan habarlamada.

Sonymen qatar, ol qarajatty alyp, shetel valútasyna aıyrbastaý boıynsha qarjylyq operasıalardy júzege asyrǵan.

"Ol urlanǵan qarajatty jylystatý úshin jyljymaıtyn múlikpen jalǵan mámileler jasaǵan. Qylmystyq kiristerdi zańdastyrý jáne jylystatý áreketteri 2019-2022 jyldar aralyǵynda iske asyryldy. Ol jer telimderin satyp alyp, qurylys kompanıalaryna ótkizip, paıdalanýǵa berilgen úılerden syıaqy retinde páterlerdi alyp otyrǵan", - dep jazylǵan habarlamada.

Jeksenǵalıevten memleket kirisine tárkilengen múliktiń somasy 4,7 mıllıard teńge bolady.