2024 jyly Qashaǵan ken ornynan munai óndirýden túsken jalpy kiris 11 milliard dollardan asqanymen, Qazaqstan bul jobadan nebári $650 mln ǵana tabys kórdi. Al jobanyń aktsionerleri 2 milliard dollardan astam taza paida tapqan, dep habarlaidy Dalanews.kz Aq Jaiyq basylymyna silteme jasap.
"Qazaqstan $11 mlrd túsimniń tek 6%-yn ǵana ielendi", – delingen jariialanǵan materialda.
"Nátijesinde, Qazaqstan Qashaǵan munaiynan $650 mln ǵana tapty, al aktsionerlerdiń tabysy $2 mlrd-tan asty. Respýblika úlesi, salyqtardy qosa eseptegende, jalpy tabystyń bar bolǵany 6%-yn qurady. Bul – Qazaqstan ǵana emes, álemdegi eń tómen kórsetkishterdiń biri", – dep jazady basylym.
Túsimniń 80%-y – shyǵyndy jabýǵa jumsalǵan
PSA (Ónimdi bólý týraly kelisim) kompaniiasynyń málimetinshe, 2024 jyly Qashaǵan jobasyn iske asyryp jatqan konsortsiým munai, gaz jáne kúkirt satý arqyly $11 mlrd-tan astam kiris tapqan. Alaida osy qarajattyń 80%-y aktsionerlerdiń kapitalyq jáne operatsiialyq shyǵyndaryn óteýge ketken (iaǵni, tikelei óndiristik shyǵyndar – Cost Oil).
Tek 20%-y ǵana "paidaly munai" retinde bólingen (Profit Oil), onyń jalpy kólemi – $2,2 mlrd. Osy paidaly munaidyń Qazaqstan Respýblikasyna tiesili úlesi – nebári 10%, iaǵni $220 mln. Buǵan qosa, jobanyń operatory NCOC biýdjetke $430 mln kóleminde salyq tólegen. Osylaisha, Qazaqstannyń jalpy tabysy $650 mln-dy qurady.
"QazMunaiGaz" aktsioner retinde ǵana qatysady
Aita keteiik, "QazMunaiGazdyń" (QMG) jobadaǵy úlesi 16,88% bolǵanymen, ol bul tabysty tikelei memleketke emes, aktsionerlik tabys retinde alady. Sol sebepti QMG-nyń tabysy memleket kirisine tikelei áser etpeidi.
Sarapshylardyń aitýynsha, Qashaǵannan memleketke túsetin naqty úles – ken ornynan 3 mlrd barrel munai alynǵannan keiin ǵana artady. Alaida, sońǵy 10 jyl ishinde bul kórsetkishtiń tek alǵashqy 1 mlrd barreli ǵana óndirilgen.
Jaqyn arada tabys salyǵy engiziledi
Bolashaqta jobanyń aktsionerleri tabys salyǵyn (korporativtik tabys salyǵy – KTS) tólei bastaidy dep kútilýde. Qazirgi tańda QMG Qashaǵannan túsken paidadan alǵashqy $45 mln salyq tólemin aýdaryp úlgerdi.
