Qaraǵandy oblysynyń Qarqaraly aýdanyndaǵy Kóktasjal men Qyzylshoqy ken oryndarynda investor aýysty. Jer qoinaýyn paidalaný quqyǵy Astana halyqaralyq qarjy ortalyǵy iýrisdiktsiiasynda tirkelgen qazaqstandyq Altyndara kompaniiasyna berildi. Birneshe jyl boiy toqyraýda turǵan joba endi jańa qarjylyq modelmen jáne aýqymdy josparlarmen qaita iske qosylmaq, dep habarlaidy Dalanews.kz.
Investor aýysqanǵa deiin ken oryndaryn «Altai Polimetaldary» JShS igerip kelgen, dep jazady Ulysmedia.kz. Alaida sońǵy jyldary kompaniia tereń qarjylyq daǵdarysqa tap boldy. Inbusiness.kz málimetinshe, 2024 jyldyń qorytyndysy boiynsha kompaniianyń shyǵyny 18,2 mlrd teńge bolǵan, al tabysy 17%-ǵa tómendegen. Qysqa merzimdi mindettemelerdiń jalpy kólemi 305 mlrd teńgeden asyp ketken.
Qaryzdyń negizgi bóligi jobany bastapqy kezeńde qarjylandyrǵan Eýropalyq qaita qurý jáne damý banki aldyndaǵy mindettemelerden quralǵan. Bereshek 17,9 mlrd teńgege baǵalanǵan, onyń ústine strategiialyq aktivter men jer qoinaýyn paidalaný quqyqtary kepilge qoiylǵan. Budan bólek, APM Holding bas qurylymy men ózge de kreditorlar aldyndaǵy qaryzdar, sonyń ishinde halyqaralyq institýttar aldyndaǵy mindettemeler jaǵdaidy kúrdelendirgen. Sonyń saldarynan táýekeli joǵary ári kúrdeli qarjylyq qurylym qalyptasqan.
Jaǵdaidy sot daýlary odan ári ýshyqtyrdy. Astana halyqaralyq qarjy ortalyǵy soty Singapýr arbitrajynyń sheshimin moiyndap, oǵan sáikes «Altai Polimetaldary» jáne onymen bailanysty baiytý fabrikasy shamamen 14 mln dollar ótemaqy men aiyppul tóleýge mindettelgen.
Másele tek qarjyda emes edi. Ártúrli kezeńderde taý-ken jumystarynyń toqtaýy jáne baiytý fabrikasynyń jumysyn doǵarýy tirkelgen. Buǵan infraqurylymnyń tozýy men jańǵyrtý qajettiligi, sonyń ishinde qaldyq saqtaý qoimasynyń jaǵdaiy sebep bolǵan.
Sonymen qatar kásiporyn jergilikti turǵyndardyń birneshe ret shaǵymyna ilikken. Kompaniia tabiǵatty qorǵaý zańnamasyn buzǵany úshin jaýapkershilikke tartylyp, bul jobaǵa degen senimdi odan ári álsiretken.
Endi aktiv Altyndara kompaniiasyna ótti. Kompaniia jobany tolyq qaita júkteýdi josparlap otyr. Aldyn ala málimetter boiynsha, damý tek ken óndirýmen shektelmei, shikizatty tereń óńdeýge baǵyttalmaq.
Sondai-aq jobany mashina jasaý jáne avtokólik óndirisi siiaqty salalarmen bailanysty óndiristik tizbekterge engizý qarastyrylýda. Iaǵni, Kóktasjaldy problemaly ken ornynan indýstriialyq klasterge ainaldyrý kózdelip otyr.
Investor mynadai aýqymdy josparlaryn jariia etti: 500 mln dollardan astam investitsiia salý; taý-ken jumystaryn keńeitý; jańa ken alańyn iske qosý; Qyzylshoqy ýchaskesinde taý-ken baiytý kombinatyn salý; 800-den astam jumys ornyn ashý.
Baǵalaý boiynsha, ken qory 50 mln tonnadan asady, onyń ishinde 500 myń tonnadan astamy - dáleldengen mys qory.
Jańa investor úshin negizgi mindet - óndiristi iske qosýdan góri, jinalyp qalǵan problemalardy sheshý. Bul - qaryzdar, sot mindettemeleri jáne, eń bastysy, jergilikti turǵyndardyń narazylyǵyn týdyrǵan ekologiialyq táýekelder.
Altyndara osy «aýyr murany» qalai eńseretini Kóktasjaldyń shyn máninde tiimdi óndiristik jobaǵa ainala ma, álde Qazaqstannyń taý-ken salasyndaǵy taǵy bir sátsiz tájiribe bolyp qala ma - sony anyqtaidy.
