Qarnaqtyń 100 jasaǵan mektebi mereitoiyn toilady
Teatrlandyrylǵan qoiylym arqyly mektep tarihyn kórsetken ustazdar men oqýshylar ásem ánder oryndap, myń burala bi biledi. Sáni men saltanaty jarasqan sahnada sóz alǵan qala ákimi Ábdibaqyt Maqulbaev Qarnaq aýylynyń turǵyndary men mektep ujymyn jáne oqýshylardy quttyqtady.
– Jalpy 2000-jyldyq tarihy bar Qarnaq aýyly aǵartýshylyq pen bilimniń, ǵylymnyń ordasy bolǵan jer. Munda esimderi elge etene tanys oishyldar Shádi Tóre, Shoqan Ýálihanov, Shortanbai Qanaiuly, Buhar Jyraý, Musabek Baizaqov, Ábýbákir Sandybaev jáne Muhtar Áýezovtiń atasy Berdiqoja sekildi kóptegen ziialy qaýym oqyp, bilim alǵan. Qurylǵanyna bir ǵasyr tolyp otyrǵan bilim ordasy – búginde qalamyzdyń jetekshi, mańdaialdy mektebine ainaldy, – dedi ákim.
Úlgili bilim shańyraǵynyń búgini de igi isterge toly, bolashaǵy da jaqsy úmit uialatady. Mektep oqýshylary jaqsy bilimimen respýblikalyq deńgeide aldyńǵy orynnan kórinip otyr. 100 jyl ishinde mektepten myńdaǵan adamdar ómirge joldama aldy. Olar oblysta, respýblikamyzdyń ár aýmaǵynda, tipti shetelderde abyroily qyzmet etýde.
Osylatsisha ákim bai dástúri bar mekteptiń qyzmeti alda da jemisti bolatynyna senim bildirdi.
Is-sharada «Dýstlik» ózbek qaýymdastyǵynyń tóraǵasy Ikram Hashimjanov, oblystyq «Janýbii Kozogiston» gazetiniń redaktory Alisher Sotvoldiev arnaiy quttyqtaýyn jetkizip, syilyqtar tabys etti.
Munan soń kópshilik mektep oqýshylary daiyndaǵan qol óner kórmesi men daryndy oqýshylardyń qolynan shyqqan túrli ǵylymi jumystardy tamashalady.
«Dalanews» aqparat
