Qarmet kompaniiasynda metallýrgiia kombinaty qyzmetkerlerin saltanatty marapattaý rásimi ótti. Kóp jylǵy adal eńbegi men ónerkásiptiń damýyna qosqan úlesi úshin kásiporyn qyzmetkerleri III dárejeli «Eńbek dańqy» tósbelgisimen, sondai-aq Qaraǵandy oblysy ákiminiń Qurmet gramotalary jáne Alǵys hattarymen marapattaldy. Saltanatty rásimdi Qazaqstan Respýblikasynyń Ónerkásip jáne qurylys ministri Ersaiyn Naǵaspaev ashty, dep habarlaidy dalanews.kz.
«Memleket basshysy Qasym-Jomart Kemeluly Toqaev óndiristi jańǵyrtý, básekege qabiletti ónim shyǵarýdy arttyrý jáne jańa tehnologiialardy engizý jóninde naqty mindetter qoidy. Alaida salanyń odan ári damýy kásibi mamandarsyz múmkin emes. Sizderdiń janqiiarlyq eńbekterińiz, joǵary jaýapkershilikterińiz ben mamandyqqa adaldyqtaryńyz – barlyq jetistiktiń negizi», – dedi ministr.
«Eńbek dańqy» tósbelgisi – saladaǵy mańyzdy marapattardyń biri. Ol kóp jylǵy adal eńbegi, joǵary óndiristik kórsetkishteri jáne Qazaqstannyń ónerkásiptik áleýetin nyǵaitýǵa qosqan eleýli úlesi úshin tabystalady. Ministr qazaqstandyq metallýrgiia salasynyń strategiialyq mańyzyn da atap ótti. Bul salada 200 myńnan astam adam eńbek etedi jáne ol el ekonomikasynyń 8 paiyzdan astamyn quraidy.
Joǵary marapattarǵa taý-ken metallýrgiiasy salasynyń damýyna uzaq jyldar boiy súbeli úles qosyp kele jatqan jumysshy jáne injenerlik-tehnikalyq mamandyq ieleri ie boldy. Marapattalǵandardyń qatarynda domna peshteriniń gornovoilary, aglomeratshylar, óndiristik ýchaske brigadirleri, mashinister, injenerler jáne ózge de mamandar bar.
Qaraǵandy oblysy ákiminiń orynbasary Ermek Alpysov metallýrgterdiń kúndelikti eńbegi óńir men eldiń indýstriialyq damýynyń basty tiregi ekenin atap ótti.
«Óńir men tutas el ekonomikasynyń negizin dál sizderdiń eńbekterińiz qalyptastyrady. Búginde Qarmet damýdyń jańa kezeńine qadam basty. Qazir aýqymdy jańǵyrtý baǵdarlamasy júzege asyrylyp jatyr. Metallýrg mamandyǵy artyq sózdi qajet etpeidi. Onyń nátijesi óndirilgen metall kólemimen, qabyldanǵan sheshimderdiń dáldigimen jáne jaýapkershilikpen ólshenedi. Jas mamandarǵa arnaiy úndeý jasaǵym keledi. Tájiribeli áriptesterińizden úirenińizder, kásiporynnyń eńbek dástúrin qurmetteńizder, kásibi bilimderińiz ben daǵdylaryńyzdy únemi jetildirip otyryńyzdar. Eń bastysy – óndiriste qaýipsizdik árdaiym birinshi orynda ekenin umytpańyzdar. Barshańyzdy kásibi merekelerińizben shyn júrekten quttyqtaimyn! Denderińizge saýlyq, otbasylaryńyzǵa amandyq, eńbekterińizge tabys tileimin. Árbir jetistigimiz elimizdiń damýyna qosylǵan mańyzdy úles bolsyn!», – dedi Ermek Alpysov.
«Jaqtaý» metallýrgter kásipodaǵynyń tóraǵasy Viktor Shetinin ujymǵa qoldaý kórsetý men kásiporyn qyzmetkerlerimen ashyq dialogty damytý birlesken jumystyń mańyzdy baǵyttarynyń biri ekenin aitty.
«Biz úshin qyzmetkerlerdiń pikirin tyńdaý, usynystaryn eskerip, óndiristiń turaqtylyǵy men árbir qyzmetkerdiń ál-aýqatyna áser etetin máselelerdi birge sheshý asa mańyzdy. Búgin barshańyzǵa adal eńbekterińiz, kásibilikterińiz jáne kásiporynnyń damýyna qosqan zor úlesterińiz úshin shynaiy alǵysymdy bildiremin. Sizderdiń eńbekterińiz zor qurmet pen joǵary baǵalaýǵa laiyq. Ózderińizge jáne otbasylaryńyzǵa zor densaýlyq, amandyq pen baq-bereke tileimin. Kombinatymyzdyń jumysy turaqty ári qaýipsiz bolyp, jańa jetistikterge jetip, qarqyndy dami bersin. Kásipornymyz ben týǵan qalamyzdyń bolashaǵy jarqyn ári órkendi bolsyn! Merekelerińiz qutty bolsyn!», – dedi Viktor Shetinin.
Marapattalǵandardyń biri – qubyrlardy elektrmen dánekerleý tsehynyń aýysym sheberi Ardaq Nuralyuly Saǵadiev. Ol eńbek jolyn kásiporynda 18 jasynda bastap, ajarlaýshydan óndiristik aýysym basshysyna deiingi joldan ótken.
«Bul kásiporynda 18 jasymnan beri jumys isteimin. Alǵashynda ajarlaýshy boldym, keiin brigadir qyzmetine kóterildim. Odan soń tehnolog-operator bolyp aýysyp, aýysymmen eńbek ettim. Osy jerge kelgennen beri osy kásiporynda qalyp qoidym. Bul jer meniń ómirimniń ajyramas bóligine ainaldy. Búgin alǵash ret osyndai qurmetti marapatqa ie boldym. Qýanyshym erekshe. Bul – eńbegimniń moiyndalǵanynyń belgisi ári úlken mártebe. Osyndai joǵary baǵalaǵany úshin kompaniiaǵa alǵysym sheksiz», – dedi metallýrg.
Marapattalǵandardyń qatarynda Qarmet metallýrgiia kombinaty temirjol kóligi basqarmasynyń jol monteri Saltanat Dúisembaiqyzy Súleimenova da bar.
«Osyndai joǵary marapatqa ie bolǵanyma óte qýanyshtymyn. Áriptesterim úshin de qýanyshtymyn. Tolqynysymdy sózben jetkizý qiyn. Eńbegiń men atqarǵan jumysyńnyń laiyqty baǵalanýy – erekshe sezim. Barsha áriptesterimdi Metallýrg kúnimen quttyqtaimyn. Eń bastysy – bárimiz aman-saý bolaiyq!», – dedi ol.
Marapattaý rásimi Metallýrg kúnine arnalǵan merekelik is-sharalardyń eń mańyzdy sátteriniń biri boldy. Ol taǵy bir márte Qarmet-tiń barlyq jetistiginiń negizinde adamdardyń eńbegi turǵanyn kórsetti. Qyzmetkerlerdiń tájiribesi, kásibiligi jáne óz isine degen adaldyǵy kásiporynnyń turaqty damýyna, eńbek dástúrin saqtaýǵa jáne jańa óndiristik belesterdi baǵyndyrýyna jol ashyp keledi.
