Ashylý saltanatyna Túrkistan oblysynyń ákimi J.Túımebaev, QR Qarjy mınıstrliginiń jaýapty hatshysy B.Tortaev, Túrkistan oblysy boıynsha memlekettik kirister departamentiniń basshysy Á.Tilegenov pen qala ákimi Á.Óserbaev qatysty.
Saltanatty jınalysty oblys ákimi alǵy sózimen ashyp, Elbasy Jarlyǵymen oblys ortalyǵyn Túrkistan qalasyna kóshirý jumystary josparǵa saı júrgizilip jatqanyn tilge tıek etti. Sondaı-aq, Qazaqstan Respýblıkasynyń Qarjy mınıstrliginiń oblystyq organdarynyń Túrkistan qalasynda ókildikteriniń ashylýy berilgen tapsyrmany oryndaýdyń alǵy sharttary ekendigin atap ótti.
Zamanaýı qurylǵylar arqyly kórsetiletin sapaly qyzmet – búdjettiń salyq túsimin kóbeıtýge septigin tıgizeri anyq. Munda jalpy 48 túrli qyzmet kórsetilse, onyń 40-y elektrondy túrde kórsetiledi. Mamandar «Bir tereze» qaǵıdasy arqyly halyqqa jyldam ári sapaly qyzmet etpek.
Jalpy oblys boıynsha búgingi kúnge deıin atalǵan mekeme arqyly halyqqa 1 mln. 48 myń qyzmet kórsetilse, onyń 941-i elektrondy túrde kórsetilgen.
Sonymen qatar, QR Qarjy mınıstrliginiń jaýapty hatshysy B.Tortaev, Túrkistan oblysynyń qurylýymen quttyqtaı kele, Qazaqstan Respýblıkasynyń Qarjy mınıstrliginiń oblystyq organdarynyń ókildiligin jańa oblys ortalyǵynda ashýdyń negizgi maqsaty – memlekettik organdardy ǵımarattarmen qamtamasyz etý, ornalastyrý jáne kóship keletin qyzmetkerlerge áleýmettik jaǵdaı jasaýdy úılestirý jumystaryn júrgizý ekendigine toqtaldy.
Saltanatty túrde lenta qıý rásiminen soń qatysýshylar ǵımaratta ornalasqan ókildikterdiń jaǵdaıymen tanysty.
Eske sala keteıik, jalpy Túrkistan oblysy boıynsha Shymkent qalasynda ornalasqan 30 aýmaqtyq memlekettik organ bar bolsa, kelesi aıdyń ishinde olardyń barlyǵy osynda Túrkistan qalasyna kóshpek. Al ákimdikke qarasty oblystyq 24 basqarma da kelesi aıda tolyǵymen kóship, jańa oblys ortalyǵynda óz jumystaryn bastamaq.
Túrkistan oblysy ákiminiń baspasóz qyzmeti
