Keshen memlekettik jekemenshik seriktestik aiasynda salynǵan. Basty merdiger «SK «Elitstroi proekt» JShS bolyp tabylady. Nysannyń aýmaǵy 1,6 gektardy alyp jatyr. Ǵimarattyń boi kóterýine 1 mlrd 782 mln 785 myń teńge qarajat jumsalǵan.
Kórseń kóziń toiatyn, sáýleti kelisken keshen 3 bólikten turady. Munda sportpen ainalysýǵa yqylasy aýǵan qaýymǵa kerektiniń bári bar.
1-blok kúres jáne boks túrlerimen ainalysýǵa, sondai-aq jattyǵý sabaqtaryna arnalǵan ámbebap zaldan quralǵan. Al, 2-blok eki qabatty, sonymen birge jertóleni qamtidy.
Jertólede tehnikalyq, kiim aýystyrý bólmesi men jýynatyn jer ornalasqan. Odan bólek, bi jáne saýyqtyrý gimnastikasynyń ár túrleri boiynsha sabaqtar ótkizýge arnalǵan zal da bar.
Sondai-aq, ústel tennisin úirenýge de jaǵdai jasalǵan. Kir jýýǵa arnalǵan oryndy da jertóleden ornalasqan. Ekinshi qabatta ákimshilik, konferents-bólmeleri jaiǵastyrylǵan.
3-blokqa keletin bolsaq, shaǵyn fýtbol, voleibol, gandbol oiyndaryna arnalǵan 325 oryndyq tribýnasy bar ámbebap zaldy kórýge bolady. Múmkindigi shekteýli azamattarda nazardan tys qalmaǵan. Blokta erekshe kútimdi qajet etetin jandarǵa arnalǵan 6 oryn qarastyrylǵan.
Barshaǵa ortaq qýanyshtyń iske asýy Prezidentimizdiń Halyqqa Joldaýynda aitqan buqaralyq sportty damytý, týǵan jerin kórkeitý kerek degen bastamasynyń jolǵa qoiylǵandyǵynyń aiqyn kórinisi bolyp tabylady.
– Metsenattardyń ekonomikanyń basqa salalarymen qatar sportqa qoldaý kórsetýi óskeleń urpaqqa qyzmet etkeni dep túsinemiz. Osyndai igi istiń atqarylýyna muryndyq bolǵan SK «Elitstroi proekt» qurylys kompaniiasynyń tóraǵasy, metsenat Bekzat Sarmanov jáne Qairat Orazbekovqa rizashylyǵymyzdy bildiremiz, – dedi óńir basshysy Amandyq Batalov óz sózinde.
Keshen zamanaýi jabdyqtarmen jabdyqtalǵan. Munda aýdan jurtshylyǵy úshin sportpen ainalysýǵa barlyq múmkindik jasalynǵan.
Jyl saiyn dene shynyqtyrý men sport salasyn damytýǵa bólinetin qarjy kólemi artyp, sport mektepteriniń materialdyq-tehnikalyq bazasy nyǵaitylýda. Oǵan dádel, bir ǵana Almaty oblysynda dál osyndai taǵy 6 keshenniń qoldanysqa berilýi bolmaq.
Aldaǵy ýaqytta, jańadan irge tasy qalanǵan nysanda respýblikalyq jáne halyqaralyq deńgeide jarystar ótkiziledi dep kútilýde. Dál osy eńseli ǵimarattan , elimizdiń namysyn qorǵaityn, eńsesi biik jas sportshylar shyǵady degen senim mol.
Anar SABYROVA, Almaty oblysy.
