Qaraǵandyda ótken jekpe-jek týrnirinen keiin 18 jastaǵy sportshy Aryslan Atymtaev aýyr hálde aýrýhanaǵa tústi. Qazir ol jansaqtaý bóliminde jatyr. Bul týraly týystary men quzyrly organdar málimdedi, dep habarlaidy Dalanews.kz.
Halyqstan telegram arnasynyń málimetinshe, oqiǵa 15 aqpanda, qalalyq jekpe-jek federatsiiasy uiymdastyrǵan týrnirdiń ekinshi kúninde bolǵan. Sportshynyń jaqyndarynyń aitýynsha, jekpe-jekterdiń birinde qarsylasy tyiym salynǵan ádis qoldanyp, Aryslandy basymen tómen qarata laqtyrǵan. Alaida tóreshiler jekpe-jekti toqtatpaǵan.
Sol sátten keiin Aryslannyń jaǵdaiy kúrt nasharlap, basyn ustap otyrǵan. Biraz ýaqyttan soń esinen tanyp qalǵan.
Jábirlenýshiniń ápkesi Ińkár Qalievanyń sózinshe, jarys ornynda tolyqqandy meditsinalyq kómek kórsetilmegen.
"Oqiǵa ornynda qajetti reanimatsiialyq jabdyqtary joq medbike bolǵan. Jedel járdem kezekshilik etpegen, tipti ony shaqyrmaǵan. Aryslandy omyrtqasyn bekitpei alyp shyqty, keiin meditsinalyq tasymaldaý talaptaryn saqtamai kólikke otyrǵyzǵan. Aýrýhanaǵa ony eresektersiz, tek 16 jastaǵy dostarymen jibergen. Tipti bolǵan jaitty týystary týrnir uiymdastyrýshylarynan emes, dostarynan estidi", - deidi ol.
Oblystyq densaýlyq saqtaý basqarmasy sportshynyń jaǵdaiy aýyr ekenin, onyń jansaqtaý bóliminde jatqanyn habarlady.
Al Qaraǵandy oblystyq politsiia departamentiniń baspasóz qyzmeti atalǵan derek boiynsha QR Qylmystyq kodeksiniń 114-baby boiynsha sotqa deiingi tergeý bastalǵanyn málimdedi.
"Qazirgi ýaqytta oqiǵanyń barlyq mán-jaiyn jan-jaqty ári obektivti anyqtaýǵa baǵyttalǵan qajetti tergeý áreketteri júrgizilýde", - delingen vedomstvo habarlamasynda.
