Qaraǵandy oblysynyń Politsiia departamenti jedel járdem kóliginiń júrgizýshisin soqqyǵa jyqqan Nurbolat Dákebaevqa qatysty iske pikir bildirdi, - dep habarlaidy Dalanews.kz.
Ishki ister organdary Qaraǵandyda jedel járdem kóliginiń júrgizýshisin soqqyǵa jyqqan kúdiktiniń ústinen alǵashynda buzaqylyqpen densaýlyǵyna ortasha aýyrlyqtaǵy ziian keltirý deregi boiynsha qylmystyq is qozǵaǵan edi. 1 aqpanda kúdikti ustalyp, ýaqytsha ustaý izoliatoryna qamaldy. Al sot-meditsinalyq saraptama jábirlenýshiniń jaraqaty jeńil dárejede ekenin anyqtaǵan.
Qaraǵandy oblysynyń Politsiia departamenti baspasóz qyzmeti málimetinshe, osydan keiin kúdiktiniń áreketi buzaqylyq sanatyna jatqyzylǵan.
"21 aqpanda qylmystyq is aiyptaý aktimen birge prokýrorǵa jiberildi, ol sheshimniń zańdylyǵyn tekserip, kúdiktini sotqa berdi", - dedi Qaraǵandy oblysy politsiia departamentiniń baspasóz qyzmeti ókili.
Jedel járdem júrgizýshisin urǵany úshin aiyptalǵan Nurbolat Dakebaev Qarqaraly aýdanynyń qystaqtarynyń birinde, oblys ortalyǵynan 200 shaqyrym jerde ustalǵan edi.
Sol kezde Qaraǵandy oblysynyń Politsiia departamenti bastyǵynyń orynbasary Ábil Ábildin qylmystyq isti tergeý qatań baqylaýda ekenin málimdedi.
Buǵan deiin oǵan taǵylǵan aiyp boiynsha eń joǵary jaza úsh jylǵa deiin bas bostandyǵynan aiyrý ekeni aitylǵan bolatyn.
