Qaraǵandy oblysynda polıseıler qalaaralyq baǵytta jolaýshy tasymaldaýmen aınalysqan birneshe júrgizýshiniń zańsyz áreketin anyqtady, dep habarlaıdy Dalanews.kz.
Reıd barysynda patrúldik polısıa qyzmetkerleri birneshe zańbuzýshylyqty tirkegen.
Tekserý kezinde Qyzylorda – Jezqazǵan – Qaraǵandy – Shiderti baǵytymen qatynap júrgen Toyota Estima kóliginiń júrgizýshisi buryn júrgizýshi kýáliginen aıyrylǵanyna qaramastan, jolaýshy tasymaldaýdy jalǵastyryp kelgeni anyqtaldy.
Sol sıaqty Astana – Qaraǵandy – Almaty tasjolynda taǵy bir kýálikten aıyrylǵan Toyota Alphard júrgizýshisi ustaldy.
Al Mercedes Sprinter ıesi kólik salonyndaǵy otyrǵyshtardy uıyqtaıtyn oryndarǵa aınaldyrǵany úshin ákimshilik jaýapkershilikke tartyldy.
Barlyq júrgizýshige qatysty ákimshilik hattamalar toltyrylyp, kólikter aıypturaǵyna qoıyldy.
Qaraǵandy oblystyq polısıa departamenti mundaı reıdterdiń negizgi maqsaty – jolaýshylardyń qaýipsizdigin qamtamasyz etý jáne zańsyz tasymaldyń aldyn alý ekenin atap ótti.
"Bul jumystar júıeli túrde jalǵasady. Biz úshin bastysy – jolaýshylardyń ómiri men densaýlyǵyn qorǵaý jáne jol qozǵalysy mádenıetin qalyptastyrý", – dedi departament ókilderi.
