QMA Qaraǵandy oblysy boıynsha departamenti «Sincere Systems Group» qarjy pıramıdasynyń qurylymdyq bólimshesin basqarý faktisi boıynsha sotqa deıingi tergep-tekserý júrgizýde, dep habarlaıdy Dalanews.kz.

Pıramıdanyń uıymdastyrýshylary ózderin Ulybrıtanıadan kelgen kompanıa ókilderi retinde kórsetip, azamattarǵa ártúrli komersıalyq baǵyttarǵa, sonyń ishinde medısınalyq kannabısti ósirý jáne jahandyq satylymǵa ınvestısıa salýdy usynǵan.

Klıentterdiń senimin arttyrý úshin jeke kabınetteri bar saıt qurylǵan. Onda paıdalanýshylar ishki SWP jáne SWCT tokenderi arqyly esepshottaryn tolyqtyryp, fıattyq aqshaǵa aıyrbastaı alǵan.

Kúdiktiler túsken qarjyny jeke maqsattaryna paıdalanǵan.

Keltirilgen jalpy shyǵyn 52 mln teńgeden asty.

Sot sanksıasymen kúdiktilerdiń 76 mln teńge turatyn múlkine: Temirtaý qalasyndaǵy jer ýchaskesi men kempıngke, Astana qalasyndaǵy páter men avtoturaqqa tyıym salyndy.

Kúdiktilerdiń biri úıqamaqqa alynǵan, ekinshisi — elden shyqpaý týraly qolhatpen bosatylǵan.

Sotqa deıingi tergep-tekserý aıaqtalyp, is materıaldary tanysý úshin berildi.