Qaraǵandy oblysynda jergilikti atqarýshy organdar men kvazimemlekettik sektordyń jekelegen sýbektilerine júrgizilgen aýdit nátijesinde Qazaqstan Respýblikasynyń zańnamasyn buzýdyń jalpy somasy 5,3 mlrd teńgege jýyqtady. Bul týraly QR Joǵary aýditorlyq palatasynyń baspasóz qyzmeti málimdedi, dep habarlaidy Dalanews.kz.
“QR Joǵary aýditorlyq palatasynyń tapsyrmasymen Qaraǵandy oblysy boiynsha tekserý komissiiasy jergilikti atqarýshy organdardyń (JAO) jáne kvazimemlekettik sektor sýbektileriniń qaryzdaryn basqarý tiimdiligine aýdit júrgizdi. Aýdit qorytyndysy boiynsha jalpy somasy 5,3 mlrd teńgege jýyq qarjy buzýshylyqtary anyqtaldy”, – delingen habarlamada.
Sonymen qatar sońǵy bes jylda óńirdiń qaryz júktemesi 2,2 esege artqanyn, al qaryzǵa qyzmet kórsetý shyǵyndary 1,5 esege ulǵaiǵany anyqtaldy. Ásirese, pandemiia kezeńinde memlekettik baǵaly qaǵazdar kóptep shyǵarylyp, 2020 jylǵy qaryz limiti 3,8 mlrd teńgege asyp ketkeni belgili boldy.
“Degenmen qazirgi ýaqytta qaryz qurylymynyń oń dinamikasy baiqalǵanymen, onyń biýdjetke úlken salmaǵy 2031 jyly túsedi. Sol jyly 20 kelisimshart boiynsha 21,7 mlrd teńge kóleminde qaryzdy óteý qajet. Jalpy, 2024 jyly 1 qańtardaǵy negizgi qaryzdyń 60,4%-y 2030-2043 jyldar aralyǵynda ótelýi tiis”, – dep atap ótti Joǵary aýditorlyq palata.
Aýdit aiasynda oblystyń qarjy, ekonomika, energetika jáne turǵyn úi-kommýnaldyq sharýashylyǵy basqarmalary, sondai-aq “Qaraǵandy Sý” JShS, “Teplotranzit Qaraǵandy” JShS, “Turǵyn úi qorynyń jańǵyrtý ortalyǵy” JShS, “FK Shahter” AQ jáne Qaraǵandy qalasynyń TKSh, jolaýshylar kóligi jáne avtomobil joldary bólimi tekserildi.
Aýditorlar memlekettik organdardyń syrtqy jáne ishki qaryzdardy baqylaýdaǵy formaldy tásilin synǵa aldy. Ásirese, “Teplotranzit Qaraǵandy” JShS-niń zalaldylyǵy artyp, onyń nesielik mindettemelerin oryndai almaý qaýpi joǵarylaǵan. Sonymen qatar, “Qaraǵandy Sý” JShS biýdjetten nesie ala otyryp, taza paidasyn qatysýshylarǵa bólip, bos qarajatty banktik depozitterge ornalastyrǵany anyqtaldy.
Al “FK Shahter” AQ-daǵy qarjy menedjmentiniń tiimsizdigi júieli túrde kreditorlyq bereshektiń ósýine alyp keldi. Onyń ishinde jalaqy, salyq jáne basqa da mindetti tólemder boiynsha qaryzdar jinaqtalǵan.
Aýdit nátijesinde tekserý komissiiasy anyqtalǵan buzýshylyqtardy joiý týraly usynymdar berip, tiisti nusqamalar shyǵardy.
