قاراعاندى وبلىسىندا جەرگىلىكتى اتقارۋشى ورگاندار مەن كۆازيمەملەكەتتىك سەكتوردىڭ جەكەلەگەن سۋبەكتىلەرىنە جۇرگىزىلگەن اۋديت ناتيجەسىندە قازاقستان رەسپۋبليكاسىنىڭ زاڭناماسىن بۇزۋدىڭ جالپى سوماسى 5،3 ملرد تەڭگەگە جۋىقتادى. بۇل تۋرالى ق ر جوعارى اۋديتورلىق پالاتاسىنىڭ باسپا ءسوز قىزمەتى مالىمدەدى، دەپ حابارلايدى Dalanews.kz.

“ق ر جوعارى اۋديتورلىق پالاتاسىنىڭ تاپسىرماسىمەن قاراعاندى وبلىسى بويىنشا تەكسەرۋ كوميسسياسى جەرگىلىكتى اتقارۋشى ورگانداردىڭ (جاو) جانە كۆازيمەملەكەتتىك سەكتور سۋبەكتىلەرىنىڭ قارىزدارىن باسقارۋ تيىمدىلىگىنە اۋديت جۇرگىزدى. اۋديت قورىتىندىسى بويىنشا جالپى سوماسى 5،3 ملرد تەڭگەگە جۋىق قارجى بۇزۋشىلىقتارى انىقتالدى”، – دەلىنگەن حابارلامادا.

سونىمەن قاتار سوڭعى بەس جىلدا ءوڭىردىڭ قارىز جۇكتەمەسى 2،2 ەسەگە ارتقانىن، ال قارىزعا قىزمەت كورسەتۋ شىعىندارى 1،5 ەسەگە ۇلعايعانى انىقتالدى. اسىرەسە، پاندەميا كەزەڭىندە مەملەكەتتىك باعالى قاعازدار كوپتەپ شىعارىلىپ، 2020 جىلعى قارىز ءليميتى 3،8 ملرد تەڭگەگە اسىپ كەتكەنى بەلگىلى بولدى.

“دەگەنمەن قازىرگى ۋاقىتتا قارىز قۇرىلىمىنىڭ وڭ ديناميكاسى بايقالعانىمەن، ونىڭ بيۋدجەتكە ۇلكەن سالماعى 2031 جىلى تۇسەدى. سول جىلى 20 كەلىسىمشارت بويىنشا 21،7 ملرد تەڭگە كولەمىندە قارىزدى وتەۋ قاجەت. جالپى، 2024 جىلى 1 قاڭتارداعى نەگىزگى قارىزدىڭ 60،4%-ى 2030-2043 جىلدار ارالىعىندا وتەلۋى ءتيىس”، – دەپ اتاپ ءوتتى جوعارى اۋديتورلىق پالاتا.

اۋديت اياسىندا وبلىستىڭ قارجى، ەكونوميكا، ەنەرگەتيكا جانە تۇرعىن ۇي-كوممۋنالدىق شارۋاشىلىعى باسقارمالارى، سونداي-اق “قاراعاندى سۋ” ج ش س، “تەپلوترانزيت قاراعاندى” ج ش س، “تۇرعىن ءۇي قورىنىڭ جاڭعىرتۋ ورتالىعى” ج ش س، “فك شاحتەر” اق جانە قاراعاندى قالاسىنىڭ تكش، جولاۋشىلار كولىگى جانە اۆتوموبيل جولدارى ءبولىمى تەكسەرىلدى.

اۋديتورلار مەملەكەتتىك ورگانداردىڭ سىرتقى جانە ىشكى قارىزداردى باقىلاۋداعى فورمالدى ءتاسىلىن سىنعا الدى. اسىرەسە، “تەپلوترانزيت قاراعاندى” ءجشس-نىڭ زالالدىلىعى ارتىپ، ونىڭ نەسيەلىك مىندەتتەمەلەرىن ورىنداي الماۋ ءقاۋپى جوعارىلاعان. سونىمەن قاتار، “قاراعاندى سۋ” ج ش س بيۋدجەتتەن نەسيە الا وتىرىپ، تازا پايداسىن قاتىسۋشىلارعا ءبولىپ، بوس قاراجاتتى بانكتىك دەپوزيتتەرگە ورنالاستىرعانى انىقتالدى.

ال “فك شاحتەر” اق-داعى قارجى مەنەدجمەنتىنىڭ تيىمسىزدىگى جۇيەلى تۇردە كرەديتورلىق بەرەشەكتىڭ وسۋىنە الىپ كەلدى. ونىڭ ىشىندە جالاقى، سالىق جانە باسقا دا مىندەتتى تولەمدەر بويىنشا قارىزدار جيناقتالعان.

اۋديت ناتيجەسىندە تەكسەرۋ كوميسسياسى انىقتالعان بۇزۋشىلىقتاردى جويۋ تۋرالى ۇسىنىمدار بەرىپ، ءتيىستى نۇسقامالار شىعاردى.