Reseidiń Altai aimaǵynda samboshy qyz Kseniia Cheponova ózimen komandalas adamdary syrt kelbetine jáne ultyna tiise bergennen keiin sýitsid jasaǵan. Sportshy mert bolǵanyn aimaqtyq sambo federatsiiasy rastady, - dep habarlaidy Dalanews.kz.
Kseniianyń dostarynyń sózinshe, onyń sýitsid jasaýyna komandadaǵy ózge qyzdardyń onyń ultyna qatysty jasaǵan qysymy sebep bolýy múmkin.
17 jastaǵy samboshy ózine qol jumsardyń aldynda telegram arnasynda hat jazyp ketken. Hatta ol ultyna tiise bergendikten endigi shydai almaitynyn aitqan.
"Eger bul hatty oqyp otyrǵan bolsańyzdar, men endigi ózime qol jumsap, mert bolǵan shyǵarmyn (hatqa saǵat 17.00-ge taimer qoiylǵan). Qazir bólmemde jatqan shyǵarmyn, ata-anama habarlaisyzdar dep úmittenemin. Meniń ne kinám baryn túsinbeimin. Kózim syǵyr bolyp nemese qara tory bolǵanyma kinálimin be? Keibir adamdar muny ázilge ainaldyrǵanǵa deiin men óz ultymnan eshqashan uialmadym", - deidi ol.
Keibir BAQ betterinde Kseniianyń ózine qol jumsaýyna súiiktisimen ekige ketýi sebep bolǵan degen aqparat taraǵan. Alaida sportshynyń dostary olai dep sanamaidy. Olardyń sózinshe, sońǵy kezderi Kseniiaǵa jasalatyn býlling kóbeiip ketken.
Samboshynyń jaqyndary politsiiaǵa bul isti ózine qol jumsaýǵa deiin jetkizý baby boiynsha tergeýdi talap etti. Alaida qazirgi tańda qylmystyq is áli qozǵalmaǵan.
Aita keteiik, Altai aimaǵy - Reseidiń Jańasibir, Kemerovo oblystarymen, Qazaqstannyń Pavlodar, Abai jáne Shyǵys Qazaqstan oblystarymen shektesip jatyr. 2010 jylǵy Búkilreseilik sanaq boiynsha Altai ólkesinde orystar, nemister, ýkraindar men qazaqtar kóp.
