رەسەيدىڭ التاي ايماعىندا سامبوشى قىز كسەنيا چەپونوۆا وزىمەن كوماندالاس ادامدارى سىرت كەلبەتىنە جانە ۇلتىنا تيىسە بەرگەننەن كەيىن سۋيسيد جاساعان. سپورتشى مەرت بولعانىن ايماقتىق سامبو فەدەراسياسى راستادى، - دەپ حابارلايدى Dalanews.kz.
كسەنيانىڭ دوستارىنىڭ سوزىنشە، ونىڭ سۋيسيد جاساۋىنا كومانداداعى وزگە قىزداردىڭ ونىڭ ۇلتىنا قاتىستى جاساعان قىسىمى سەبەپ بولۋى مۇمكىن.
17 جاستاعى سامبوشى وزىنە قول جۇمساردىڭ الدىندا تەلەگرام ارناسىندا حات جازىپ كەتكەن. حاتتا ول ۇلتىنا تيىسە بەرگەندىكتەن ەندىگى شىداي المايتىنىن ايتقان.
"ەگەر بۇل حاتتى وقىپ وتىرعان بولساڭىزدار، مەن ەندىگى وزىمە قول جۇمساپ، مەرت بولعان شىعارمىن (حاتقا ساعات 17.00-گە تايمەر قويىلعان). ءقازىر بولمەمدە جاتقان شىعارمىن، اتا-اناما حابارلايسىزدار دەپ ۇمىتتەنەمىن. مەنىڭ نە كىنام بارىن تۇسىنبەيمىن. كوزىم سىعىر بولىپ نەمەسە قارا تورى بولعانىما كىنالىمىن بە؟ كەيبىر ادامدار مۇنى ازىلگە اينالدىرعانعا دەيىن مەن ءوز ۇلتىمنان ەشقاشان ۇيالمادىم"، - دەيدى ول.
كەيبىر ب ا ق بەتتەرىندە كسەنيانىڭ وزىنە قول جۇمساۋىنا سۇيىكتىسىمەن ەكىگە كەتۋى سەبەپ بولعان دەگەن اقپارات تاراعان. الايدا سپورتشىنىڭ دوستارى ولاي دەپ سانامايدى. ولاردىڭ سوزىنشە، سوڭعى كەزدەرى كسەنياعا جاسالاتىن بۋللينگ كوبەيىپ كەتكەن.
سامبوشىنىڭ جاقىندارى پوليسياعا بۇل ءىستى وزىنە قول جۇمساۋعا دەيىن جەتكىزۋ بابى بويىنشا تەرگەۋدى تالاپ ەتتى. الايدا قازىرگى تاڭدا قىلمىستىق ءىس ءالى قوزعالماعان.
ايتا كەتەيىك، التاي ايماعى - رەسەيدىڭ ءجاڭاسىبىر، كەمەروۆو وبلىستارىمەن، قازاقستاننىڭ پاۆلودار، اباي جانە شىعىس قازاقستان وبلىستارىمەن شەكتەسىپ جاتىر. 2010 جىلعى بۇكىلرەسەيلىك ساناق بويىنشا التاي ولكەسىندە ورىستار، نەمىستەر، ۋكرايندار مەن قازاقتار كوپ.
