Qazaqstannyń Tótenshe jaǵdailar ministrligi taýly óńirlerde qar kóshkini qaýpi bar ekenin eskertti, dep habarlaidy Dalanews.kz.
Vedomstvo taratqan málimetke sáikes, júrgizilgen monitoring pen tekserý jumystarynyń nátijesinde taýly aimaqtarda qar jamylǵysynyń jinalý protsesi áli de jalǵasyp jatqany anyqtalǵan. Aýa raiynyń turaqsyzdyǵyna bailanysty jekelegen ýchaskelerde qardyń ózdiginen syrǵý qaýpi saqtalyp otyr.
«Ońtústik, ońtústik-shyǵys óńirlerdiń biik taýly aimaqtarynda, sondai-aq Shyǵys Qazaqstan oblysynyń taýlarynda lavinalyq qaýipti jaǵdai saqtalýda. Qar basqan tik betkeilerge shyǵý usynylmaidy, sebebi bul qar kóshkininiń júrýine sebep bolýy múmkin», – delingen ministrlik habarlamasynda.
Sonymen qatar TJM-ge qarasty «Qazseldenqorǵaý» memlekettik mekemesiniń mamandary qar jamylǵysynyń jinalý kólemi men lavina qaýpi bar ýchaskelerdiń jaǵdaiyna turaqty túrde monitoring júrgizip otyr. Qaýipti aýmaqtarda tekserý jumystary júieli túrde atqarylýda.
Tótenshe jaǵdailar ministrligi turǵyndar men taýly aimaqtarǵa shyǵýdy josparlaǵan azamattardy qaýipsizdik talaptaryn qatań saqtaýǵa jáne resmi eskertýlerdi nazardan tys qaldyrmaýǵa shaqyrady.
