قازاقستاننىڭ توتەنشە جاعدايلار مينيسترلىگى تاۋلى وڭىرلەردە قار كوشكىنى ءقاۋپى بار ەكەنىن ەسكەرتتى، دەپ حابارلايدى Dalanews.kz.
ۆەدومستۆو تاراتقان مالىمەتكە سايكەس، جۇرگىزىلگەن مونيتورينگ پەن تەكسەرۋ جۇمىستارىنىڭ ناتيجەسىندە تاۋلى ايماقتاردا قار جامىلعىسىنىڭ جينالۋ پروسەسى ءالى دە جالعاسىپ جاتقانى انىقتالعان. اۋا رايىنىڭ تۇراقسىزدىعىنا بايلانىستى جەكەلەگەن ۋچاسكەلەردە قاردىڭ وزدىگىنەن سىرعۋ ءقاۋپى ساقتالىپ وتىر.
«وڭتۇستىك، وڭتۇستىك-شىعىس وڭىرلەردىڭ بيىك تاۋلى ايماقتارىندا، سونداي-اق شىعىس قازاقستان وبلىسىنىڭ تاۋلارىندا لاۆينالىق ءقاۋىپتى جاعداي ساقتالۋدا. قار باسقان تىك بەتكەيلەرگە شىعۋ ۇسىنىلمايدى، سەبەبى بۇل قار كوشكىنىنىڭ جۇرۋىنە سەبەپ بولۋى مۇمكىن»، – دەلىنگەن مينيسترلىك حابارلاماسىندا.
سونىمەن قاتار تجم-گە قاراستى «قازسەلدەنقورعاۋ» مەملەكەتتىك مەكەمەسىنىڭ ماماندارى قار جامىلعىسىنىڭ جينالۋ كولەمى مەن لاۆينا ءقاۋپى بار ۋچاسكەلەردىڭ جاعدايىنا تۇراقتى تۇردە مونيتورينگ جۇرگىزىپ وتىر. ءقاۋىپتى اۋماقتاردا تەكسەرۋ جۇمىستارى جۇيەلى تۇردە اتقارىلۋدا.
توتەنشە جاعدايلار مينيسترلىگى تۇرعىندار مەن تاۋلى ايماقتارعا شىعۋدى جوسپارلاعان ازاماتتاردى قاۋىپسىزدىك تالاپتارىن قاتاڭ ساقتاۋعا جانە رەسمي ەسكەرتۋلەردى نازاردان تىس قالدىرماۋعا شاقىرادى.
