Qolaisyz aýa raiyna bailanysty Qazaqstannyń birneshe óńirinde avtojoldardyń 20-dan astam bóligi ýaqytsha jabyldy, dep habarlaidy Dalanews.kz.
Ishki ister ministrligi Ákimshilik politsiia komitetiniń deregine súiensek, shekteýler Abai, Aqtóbe, Aqmola, Atyraý, Batys Qazaqstan, Qaraǵandy, Qostanai, Qyzylorda jáne Shyǵys Qazaqstan oblystaryndaǵy birqatar tasjolǵa engizilgen. Mundai sheshim qardyń mol jaýýy, burqasyn men kóktaiǵaqtyń kúsheiýi saldarynan jol qozǵalysy qaýipsizdigin saqtaý úshin qabyldanǵan.
Vedomstvo júrgizýshilerge jolda barynsha saq bolýdy eskertip, jyldamdyqty aýa raiyna sai tómendetýdi jáne kólikter arasyndaǵy araqashyqty ulǵaitýdy usynady. Sonymen qatar qaýipti ýchaskelerde apattyq belgi berip, kúrdeli manevrler men jolaq aýystyrýdan ýaqytsha bas tartý qajet.
IIM ÁPK-niń erekshe tapsyrmalar jónindegi aǵa inspektory Aqtoty Boranovanyń aitýynsha, asa mańyzdy qajettilik bolmasa, alys jolǵa shyqpaǵan durys. Eger sapardy keiinge qaldyrý múmkin bolmasa, baǵytty aldyn ala josparlap, kóliktiń tehnikalyq jaǵdaiyn tekserý qajet. Bul sharalar jol-kólik oqiǵalarynyń aldyn alyp, turǵyndardyń qaýipsizdigin qamtamasyz etýge baǵyttalǵan.
