| Qapshaǵaı qalasynyń ákimi Talǵat Qaınarbekov oblys ákimi Amandyq Batalovty qalalyq saıabaq aýmaǵyn damytý tujyrymdamasymen, jaǵajaı aýmaǵyn damytý men kóp qabatty úılerdiń aýlalaryn abattandyrý syzbasymen, sol sıaqty mádenıet úıleri men dene shynyqtyrý-saýyqtyrý keshenderi qurylysynyń jobalyq úlgilerimen tanystyrdy. Prezentasıa zamanýı landshaftyq dızaın elementterin qoldana otyryp jańǵyrtylǵan qalalyq saıabaqta ótti. Oblys ákimi mádenıet úıleri men DSK jobalaryn áli de egjeı-tegjeıli qarastyrýdy, dese de bıylǵy jylǵa josparlanǵan qurylys jumystaryn merziminen keshiktirmeı bastaýdy tapsyrdy.
Munan keıin oblys ákimi 104 oryndyq trıbýnasy bar jańa stadıonda boldy. Stadıonnyń janynda basketbol, boks, tenıs, voleıbol oınaıtyn 5 sporttyq alań bar. Bul jobalardy júzege asyrýǵa 138,5 mln. teńge baǵyttalǵan. Sonymen qatar oblys ákimine qalalyq jaǵajaıda júrgizilgen qurylys jumystary da kórsetildi. Munda da demalýshylarǵa qolaıly jaǵdaılar qalyptastyrý úshin barlyq múmkindikter jasalǵan. Jaǵajaıǵa baratyn jol salynyp, avtokólikke arnalǵan oryn qarastyrylǵan. Júgirýge, jaıaý júrginshilerge arnalǵan joldar tóselip, jol jamylǵysy túrli-tústi tastan jasalǵan. Jaǵalaý aımaǵynda 200 avtokólikke arnalǵan avtoturaq bar. Barlyq jumys 2017 jyldyń aqpanynan maýsym aıyna deıin júrgizildi. Jobany júzege asyrýǵa 557,7 mln. teńge jumsalǵan. Qalany aralaý baǵdarlamasy turǵyn úıler aýlalaryn kórýmen jalǵasty. Amandyq Batalov 1-shaǵyn aýdandaǵy № 24, 25 úıler alańdarynda bolyp, ondaǵy fýtbol, oıyn jáne sporttyq alańdardy kórdi. Kire beris jol men trotýardyń asfált jabyndysy aýystyrylyp, kógaldandyrylǵan, oryndyqtar ornatylyp, qoqys jáshikteri qoıylǵan. Abattandyrýdyń ereksheligi sol, birneshe aýla bir fýtbol alańyna biriktirilgen, jeke aýmaqtarda «MaksDorstroıServıs» JSHS daıyndaǵan balalar átkenshekteri, oryndyqtar, besedkalar qoıylǵan. Seriktestiktiń bas dırektory Aleksandr Skoropatskııdiń aıtýynsha, atalmysh zattar uzaq merzim qyzmet etedi, sapaly, qaýipsiz, qolaıly. Óz kezeginde T. Qaınarbekov bıylǵy jyly aýlalardy abattandyrý jobalarynda turǵyndardyń usynys-pikirleri eskerilgenin atap ótti. Endi birqatar aýlalarda hokeı alańdary da salynbaq. Jalpy ótken jyly Qapshaǵaı qalasynda 29 aýla abattandyrylsa, bıylǵy jyly taǵy 30-yn jańǵyrtýǵa qarjy qarastyrylyp, qurylys jumystary júrgiziletin bolady. Munan soń «Qapshaǵaıjylý» MKK-nyń sý jylytý qazandyǵyna barǵan oblys ákimi mundaǵy jańǵyrtý jumystaryna kýá boldy. T.Qaınarbekovtiń sózine súıensek, barlyq jumystar jospar boıynsha jáne sapaly jasalýda, sonymen qatar Qapshaǵaı qalasy men Zarechnyı aýylynyń qazandyqtaryn aldaǵy ýaqytta tabıǵı gazǵa qosýdyń tehnıkalyq sharttary alynǵan, bul qatty otynǵa qaraǵanda áldeqaıda tıimdi bolady deıdi mamandar. Qapshaǵaı qalasyn aralaý barysynda oblys ákimi Amandyq Batalov qalany abattandyrý boıynsha ońdy ister jasalyp, tapsyrmalar sapaly júzege asyrylǵanyn atap ótti. Jıynǵa qatysqan oblystyń aýdan, qalalarynyń ákimderin Qapshaǵaıda júzege asyrylyp jatqan abattandyrylý boıynsha jobalardan úlgi alýǵa shaqyrdy. – Áriptesterińizdiń ońdy tájirıbesin kóńilge túıip qoıý kerek. Qapshaǵaıda turǵyn úılerdiń aýlalaryn kórkeıtý jumystary sátti júrgizilip keledi. Bul isti árbir aýdan, qalada jasaýǵa bolady. Búgin aýlalar, jaǵajaı, saıabaq aýmaqtary men qurylys alańdarynda birshama kórnekti isterdiń úlgilerdi kórdik. Árbir iste ıdeıalaryńyzdy aıtyp, bastamashyl bolýlaryńyz kerek, al biz óz tarapymyzdan barynsha qoldaý kórsetemiz, – degen A.Batalov, budan ári Qapshaǵaıdaǵy saparyn oblys ákimdiginiń kóshpeli májilisimen jalǵastyrdy. |
Almaty oblysy ákiminiń baspasóz qyzmeti
