Qapshaǵai sý qoimasynda sýǵa batyp bara jatqan adamǵa kómekke umtylǵan Qonaev qalasynyń turǵyny Andrei Koziatinskii qaza tapty, dep habarlaidy dalanews.kz.
Qaiǵyly jaǵdai týraly Qonaev qalasynyń ákimi Ashat Berdihanov áleýmettik jelidegi paraqshasynda habarlady.
Qala basshysynyń aitýynsha, Andrei Koziatinskii óz ómirine tóngen qaýipke qaramastan, qiyn jaǵdaiǵa tap bolǵan demalýshyny qutqarýǵa áreket jasaǵan.
«Qonaev qalasynyń turǵyny Andrei Filippovich Koziatinskiidiń Qapshaǵai sý qoimasynda ózgeni qutqaramyn dep, óz ómirin qiǵany týraly qaiǵyly habardy aýyr qabyldadym. Onyń áreketi – batyldyqtyń, janqiiarlyqtyń jáne joǵary adamgershiliktiń shynaiy úlgisi», – dep jazdy ákim.
Ashat Berdihanov mundai qadamǵa júregi keń ári qaisar adam ǵana bara alatynyn atap ótti.
Qala ákimi Qonaev turǵyndarynyń atynan marqumnyń ákesine, baýyryna, týǵan-týystary men jaqyndaryna kóńil aitty.
«Orny tolmas qaiǵyny bastan ótkerip otyrǵan otbasyna qoldaý bildiremin», – dedi ol.
